Ադրբեջանական SalamNews.org կայքի փոխանցմամբ, Ադրբեջանի նախագահ Իլհամ Ալիևը ռուսական Россия-24 հեռուստաալիքին տված հարցազրույցի ժամանակ անդրադարձ է կատարել Nabucco նախագծին.
«Մենք աջակցում ենք Nabucco նախագծին, սակայն առաջին հերթին պետք է հաշվի առնվեն կոմերցիոն շահերը: Պետք է սահմանվի արդար գին, կան բազում խնդիրներ` կապված մեր գազի տարանցման հետ:
Մենք չգիտենք, թե մեր գազն ի՞նչ գնով կհասնի վերջնական սպառողին, ո՞վ է վճարելու այդ գազատարի շինարարությունը, ինչպիսի՞ն կլինի դրանում Ադրբեջանի տարանցիկ դերը, քանի որ ակնհայտ է, որ Ադրբեջանի գազային պաշարները բավարար չեն խողովակաշարի լիաբեռնման համար: Դրա համար էլ անհրաժեշտ է դրանում ներգրավել միջինասիական գազը:
Մի խոսքով, դեռ անորոշ և չլուծված վիճակում են գազատարին առնչվող բազմաթիվ կոմերցիոն, տեխնիկական ու քաղաքական խնդիրներ: Ամեն ինչ կախված է լինելու նրանից, թե ինչպես կընթանան «գազային» բանակցությունները և որքանով հաշվի կառնվեն Ադրբեջանի շահերը»:
Հիշեցնենք, որ ադրբեջանական գազը Nabucco գազատարի միջոցով Եվրոպա է հասնելու թուրքական տարածքով: Ալիևի խոսքերից կարելի է ենթադրել, որ Թուրքիան և Ադրբեջանը դեռևս չեն կարողացել համաձայնության գալ Թուրքիայի տարածքով ադրբեջանական գազի տարանցման սակագների շուրջ:
Գերմանական քաղաքագետ, էներգետիկ քաղաքականության գծով փորձագետ Ալեքսանդր Ռաարի կարծիքով` 2011 թվականը վճռորոշ է լինելու Nabucco գազատարի համար, որի կառուցման մեկնարկը նախատեսված է հաջորդ տարի. «Թուրքիան այն միակ երկիրն է, առանց որի անհնար է դառնում Ռուսաստանի տարածքը շրջանցող և Կենտրոնական Ասիայից դեպի Եվրոպա ձգվող որևէ խողովակաշարի կառուցումը: Թուրքիան Nabucco և «Հարավային հոսք» գազամուղների միջև պայքարի գլխավոր հաղթողն է:
Առաջիկայում Անկարան չի պատրաստվում իրեն սահմանափակել միայն տարանցիկ երկրի կարգավիճակով, ինչպես որ ներկայումս է: Օգտագործելով իր բարենպաստ աշխարհաքաղաքական դիրքը` Անկարան վերածվելու է գազը վերավաճառող երկրի: Դա բավականին կամրապնդի Եվրոպայի ու Ասիայի միջև Թուրքիայի ունեցած էներգետիկ կամրջի դերը: Սակայն ժամանակը ցույց կտա, թե Եվրոպան որքանով Թուրքիային կթույլատրի ձեռք բերել նմանատիպ կարգավիճակ»: