Թուրքական «Բուգյուն» պարբերականում հոդվածագիր Նուհ Գյոնուլթաշը շնորհավորել է հայերին և «Ժողովրդա-հանրապետական» կուսակցությանը՝ Թուրքիայի խորհրդարանական ընտրությունների համար ազգությամբ հայ թեկնածու առաջադրելու կապակցությամբ:
Գյուլենական ուղղվածության թերթի հոդվածագիրն իր հոդվածն այդպես էլ վերնագրել է՝ «Շնորհավորանքներ հայ համայնքին և ԺՀԿ-ին»:
Գյոնուլթաշը գրում է, որ Սելինա Օզուզուն Դողանին Ստամբուլի երկրորդ ընտրատարածքի համամասնական ցուցակի առաջին տեղում ընդգրկելը «դրական, խիզախ, բայց և փոքր-ինչ ռիսկային ընտրություն է»:
«Ռիսկային է, քանի որ Թուրքիայում հայ լինելու բարդությունը պարզից էլ պարզ է: Պատմական անցքերի տեսանկյունից այստեղ շատ ընտրողների համար «հայը» կարծես Ալլահի ստեղծած մեկ այլ ժողովուրդ է, բացասական իմաստ է կրում: Եվ այս քայլի ու խիզախության համար պետք է ԺՀԿ-ին շնորհավորել»,- գրում է թուրք հեղինակը՝ ներկայացնելով հայի կերպարի ոչ դրական ընկալումներն արդի Թուրքիայում:
Այնուհետև հեղինակը պատմական ակնարկ է կատարում՝ հիշելով Թուրքիայի ազգային մեծ ժողովի ոչ մեծաթիվ այն պատգամավորներին, ովքեր ազգային կամ կրոնական փոքրամասնությունների ներկայացուցիչներ են եղել: Նա նշում է, որ հանրապետության հիմնադրման առաջին տասնամյակներին ազգային փոքրամասնությունները տեղ չեն ունեցել թուրքական մեջլիսում: 50-ականներին, երբ վերացվել է միակուսակցական համակարգը, ազգային փոքրամասնությունների, այդ թվում՝ հայերի մի շարք ներկայացուցիչներ կարողացել են պատգամավորի աթոռ ստանալ, սակայն 1964 թվականին հաջորդած տարիներին ԹԱՄԺ-ում որևէ հայ պատգամավոր չի եղել, ինչպես նաև կտրուկ քչացել է այլ փոքրամասնությունների ներկայացուցիչների թիվը:
Հիշեցնենք, որ Թուրքիայի ընդդիմադիր «Ժողովրդա-հանրապետական» կուսակցությունը նախօրեին անակնկալ է մատուցել ոչ միայն ազգությամբ հայ Սելինա Օզուզուն Դողանին խորհրդարանական ընտրությունների համար պատգամավորության թեկնածու առաջադրելով, այլ ևս մեկ ուշագրավ որոշում է կայացրել՝ Սելինա Դողանին Ստամբուլի երկրորդ ընտրատարածքի համամասնական ցուցակում առաջին տեղում ընդգրկելով:
Այս կապակցությամբ մեկնաբանությամբ է հանդես եկել նաև հայ թեկնածուն՝ նշելով, որ իր համար ևս անակնկալ է, որ Թուրքիայի գլխավոր ընդդիմադիր կուսակցությունը որոշել է նրա անունն առաջինը գրել համամասնական ցուցակում՝ փոխանցում է թուրքքական «Միլիյեթ» պարբերականը:
«Պատգամավոր ընտրվելու դեպքում Թուրքիայի Ազգային մեժ ժողովում ներկայացնելու եմ բոլոր այն խմբերին, որոնց ձայնը լսելի չէ: Երկար տարիներ թուրքական խորհրդարանում հայ պատգամավոր չի եղել, անելու շատ աշխատանք կա»,- հայտարարել է Սելինա Օզուզուն Դողանը:
Նշենք, որ Սելինա Դողանը ծնվել է 1977 թվականին՝ Ստամբուլում: Ավարտել է ֆրանսիական լիցեյը, սովորել է Գալաթասարայի իրավաբանության ֆակուլտետում, ապա նաև Բիլգի համալսարանում: Այժմ մասնավոր մի ընկերությունում որպես իրավաբան է աշխատում: Նա տիրապետում է հայերենի, թուրքերենի, ֆրանսերենի և անգլերենի: Հայրը Երվանդ Օզուզունն է, ով եղել է Ստամբուլի Բաքըրքյոյի նախկին փոխքաղաքապետը: Ամուսինն էլ փաստաբան Էրդալ Դողանն է, ով Հրանտ Դինքի սպանության գործով զբաղվող փաստաբաններից է:
Այսպիսով, արդեն հայտնի է, որ Թուրքիայի խորհրդարանական ընտրություններին մասնակցելու է առնվազն 4 հայ թեկնածու, բոլորն էլ պայքարելու են Ստամբուլում: Թուրքիայի իշխող «Արդարություն և զարգացում» կուսակցությունը՝ հայ լրագրող, գրող Մարգար Եսայանի, իսկ ընդդիմադիր քեմալական «Ժողովրդա-հանրապետական» կուսակցությունը Սելինա Օզուզուն Դողանի թեկնածություններն են առաջադրել: Քրդական «Ժողովուրդների դեմոկրատական» կուսակցության համամասնական ցուցակներում երկու հայ թեկնածու կա՝ Կարո Փայլանն ու Մուրադ Մըհչըն:
Հիշեցնենք, որ Թուրքիայի Ազգային մեծ ժողովի ընտրությունները նախանշված են հունիսի 7-ին:
