«Հիմնադիր խորհրդարանի» անդամների նկատմամբ տեղի ունեցողը ակնհայտ քաղաքական հետապնդումներ են և, հերթական քաղաքական բանտարկյալներն ունենք: Այս մասին «Առաջին լրատվականի» հետ զրույցում նշեց Հայաստանի հելսինկյան կոմիտեի ղեկավար Ավետիք Իշխանյանը։
Նրա խոսքով` սա ինչ-որ իմաստով Հայաստանի համար մի փոքր աննախադեպ է, որովհետև մեծ մասամբ այսպիսի քաղաքական հետապնդումները, ձերբակալությունները որպես կանոն եղել են նախագահական ընտրություններից հետո, չնայած բացառություններ էլ կան:
«Ընդհանրապես, ցանկացած պետության մեջ, այդ թվում և Հայաստանում, քաղաքական բանտարկյալներ են հայտնվում, քաղաքական հետապնդումներ են լինում, երբ իշխանությունը ռեալ վտանգ է տեսնում ընդդիմության տվյալ քաղաքական ուժի մեջ և սա կարելի է նայել այդ համատեքստում։ Եթե մենք վերցնենք ընդհանրապես Հայաստանի քաղաքական համայնապատկերը, ապա կարելի է ասել, որ հիմնականում բոլոր քաղաքական ուժերը այս կամ այն չափով հարմարվել են իրավիճակին և ԲՀԿ-ին ջախջախելուց հետո, կարծես թե դաշտն ամբողջությամբ քանդուքարափ եղած է, և տվյալ դեպքում իշխանություններին միակ անհանգստություն պատճառողը Հիմնադիր Խորհրդարանն է»,-ընդգծեց իրավապաշտպանը։
Ավետիք Իշխանյանի ներկայացմամբ, այստեղ ամենահետաքրքականն այն է, որ գուցե ՀԽ անդամներին բռնելով, իշխանություններն ավելի հանգիստ են, քանի որ և Բերձորի, և Գյումրիի դեպքերը ցույց տվեցին, որ Հայաստանի քաղաքական ուժերը որպես կանոն չեն քննադատում կամ շատ մեղմ եմ քննադատում իշխանությունների բռնությունները։ «Որովհետև ասում են իհարկե` բռնությունը վատ բան է, բայց… բայցը կարծես թե արդարացնում է եղած բռնությունները: Եվ այդ տեսակետից իշխանություններն ավելի ազատ են գործում ՀԽ անդամների նկատմամբ։ Բայց այն, ինչ կատարվել է՝ առավոտյան տներ ներխուժելով և խուզարկություններ անելով, բերման ենթարկելով, սա խորհրդային տարիների ավանդույթներն են»,-ասաց նա։
Հարցին, թե կարծում եք ռեալ վտա՞նգ զգաց իշխանությունը, դրա համա՞ր սկսեց ձերբակալություններ, իրավապաշտպանը պատասխանեց, որ ձեռնպահ կմնա այդպես ասել, բայց կարծում է, որ ինչ-որ վտանգ տեսել են։
«Ես չէի ասի, որ նրանց գործունեությունը գաղտնի է եղել կամ ունեցել են գաղտնի ահաբեկչական սցենարներ, որովհետև նրանք բավական բաց ու թափանցիկ են գործել։ Սա է իմ տպավորությունը: Այսինքն՝ հավատ չի ներշնչում պնդումը, թե նրանք չգիտեմ ինչերի են նախապատրաստվել։ Եթե դուք ուշադրություն դարձրել եք, ժամանակին ոստիկանապետն ասաց, որ մենք գիտենք, թե տարբեր տեղերում ինչպես է շնչում ընդդիմությունը։ Եթե ոստիկանությունն է դա ասում` ինչ ասել ԱԱԾ-ի մասին, փաստորեն, տոտալ վերահսկողության տակ ես, փոխանակ այդ հատուկ ծառայությունները Հայաստանի անվտանգության վրա աշխատեն`իշխանության անվտանգության վրա են աշխատում»,- իր խոսքն ամփոփեց իրավապաշտպանը։
