Ռազմական գործողությունների և բռնության ակտերի պատճառով մարտի 19-ից առ այսօր Եմենում զոհվածների թիվը հասել է 549-ի, նրանցից 200-ից ավելին խաղաղ բնակիչներ են, այս մասին տեղեկացրել է ՄԱԿ-ի Հումանիտար հարցերի կոորդինացիայի վարչությունը։
«Համաձայն Առողջապահության համաշխարհային կազմակերպության տվյալների՝ 549 մարդ սպանվել է, և 1707 մարդ վնասվածքներ է ստացել Եմենում բռնությունների հետևանքով՝ մարտի 19-ից ի վեր։ Դա ներառում է ամենաքիչը 217 մահ և 516 վիրավորում՝ քաղաքացիական անձանց, որոնցից շատերը զոհվել են Սանայում երկու մզկիթների պայթեցման հետևանքով, մարտի 20-ին»,- նշվում է ՄԱԿ-ի հաղորդագրության մեջ։
Հումանիտար վարչությունում ընդգծել են, որ զոհերի և վիրավորների քանակի մասին ստացվող տվյալները հաճախ նվազեցվում են, քանի որ «բազմաթիվ մարդիկ հնարավորություն չեն ունենում բժշկական օգնություն ստանալ հիվանդանոցներում, իսկ ընտանիքներն ինքնուրույն թաղում են իրենց հարազատներին՝ նախքան նրանց մասին տեղեկություններ հավաքել կարողանալը»։
