Ատոմային էներգիայի միջազգային գործակալությունը Հյուսիսային Կորեայի կողմից այսօր անցկացված միջուկային փորձարկումները համարել է ՄԱԿ ԱԽ-ի բանաձևի խախտում: Այս մասին հաղորդում է AFP-ն՝ հղում կատարելով կազմակերպության հայտարարությանը:
«Հյուսիսային Կորեան հայտարարել է միջուկային զենքի երրորդ փորձարկման մասին՝ անտեսելով միջազգային հանրության՝ փորձեր չկատարելու կոչերը: Դա ՄԱԿ ԱԽ-ի բանաձևի խախտում է»,- հայտարարել է ԱԷՄԳ-ի ղեկավար Յուկիա Ամանոն:
Իր հերթին Եվրամիության արտաքին քաղաքականության ներկայացուցիչ Քեթրին Էշթոնը խստորեն դատապարտել է Հյուսիսային Կորեայի միջուկային փորձարկումները ու երկրի իշխանություններին կոչ է արել զերծ մնալ հետագա «սադրիչ» գործողություններից՝ հաղորդում է Reusters գործակալությունը:
Հյուսիսային Կորեայի միջուկային փորձարկումը դատապարտել է նաև ՆԱՏՕ-ն՝ հայտարարելով, որ այն վտանգ է ներկայացնում միջազգային կայունությանը:
Հիշեցնենք, որ այսօր Կորեայի կենտրոնական հեռագրային գործակալությունը հրապարակել էր հաղորդագրություն ստորերկրյա միջուկային փորձարկումների հաջող անցկացման մասին:
Հարավային Կորեան այսօր ՄԱԿ ԱԽ-ի արտահերթ նիստ է հրավիրում՝ կապված Հյուսիսային Կորեայի միջուկային փորձարկումների հետ: Հյուսիսային Կորեայի արարքն արդեն դատապարտել են ԱՄՆ-ը, Չինաստանը, Մեծ Բրիտանիան, Ճապոնիան և Ֆրանսիան:
