ՀՀ նախագահի թեկնածու Րաֆֆի Հովհաննիսյանն այսօր Տավուշի մարզում էր և իր նախընտրական քարոզարշավը սկսեց Դիլիջան քաղաքից, որտեղ նրան հոծ բազմություն էր սպասում: Հովհաննիսյանն ընտրողներին ներկայացրել է իր ծրագրային հիմնադրույթները՝ ընդգծելով ժողովրդի սոցիալական վիճակը շեշտակիորեն բարելավելու հրամայականը: «Մենք բազմիցս շեշտել ենք, որ բոլոր հնարավորություններն առկա են նոր նախագահության առաջին իսկ տարում բյուջե վերադարձնել 300 մլրդ դրամ, ինչը թույլ կտա 50 տոկոսով բարձրացնել կենսաթոշակները, էապես մեծացնել գիտության ու կրթության, առողջապահության և պաշտպանության ֆինանսավորումը»,- նշել է նա:
Օրվա ընթացքում Հովհաննիսյանը քարոզարշավը շարունակել է Իջևանում, այցելել է Գետահովիտ, Վազաշեն, Բերդ գյուղական համայնքները, զրուցեց մարդկանց հետ, նրանց հորդորեց փետրվարի 18-ին անպայման կատարել իրենք քաղաքացիական պարտքը՝ ձայն տալով նախընտրած թեկնածուի օգտին:
Արդեն երեկոյան Հովհաննիսյանը հանդիպել է նոյեմբերյանցիներին: Դիմելով հավաքվածներին, նա հավաստիացրել է. «Այս անգամ ի զորու ենք ընտրությունների միջոցով փոխելու երկրում տիրող իրավիճակը, որովհետև այլևս հանդուրժել չի կարելի»:
