ԱԻՄ առաջնորդ, ՀՀ նախագահի թեկնածու Պարույր Հայրիկյանը տատանվում է այս օրերի ընթացքում, հասկանալի է, որ նրա և՛ ֆիզիկական, և՛ հոգևոր, և՛ քաղաքական դրությունը բավական բարդ է այս հանցագործությունից հետո. այսօր լրագրողների հետ էքստրեմալ պայմաններում հանդիպման ժամանակ այս մասին ասաց ՀՀ նախագահի թեկնածու, հացադուլ հայտարարած Անդրիաս Ղուկասյանը:
Ըստ նրա՝ Հայրիկյանի ՍԴ դիմել-չդիմելու հարցը լարվածության մեջ պահեց հանրությանը, որովհետև ինչ-որ ազդեցություններ կարող էր ունենալ քաղաքական պրոցեսների վրա: Սակայն Ա. Ղուկասյանն ասաց՝ համարենք, թե այդ ազդեցություններն արդեն հասել են իրենց ավարտին:
«Բոլորիս պարզ է, որ քվեարկության օրը չի տեղափոխվի, այն լինելու է փետրվարի 18-ին: Երկրում ընտրությունները շինծու են, վստահ եմ՝ այդ պատճառաբանությունը պարզ է բոլորին, որովհետև եթե հակասահմանդրական կուսակցությունը մասնակցում է ընտրություններին, նման ընտրությունները չեն կարող լինել ազատ և իսկական: Այդ մասով, միասնական թեկնածու լինի թե միասնական թեկնածու չլինի Հայաստանում, քաղաքական իրադրության չի փոփոխվի»,- մեկնաբանեց Անդրիաս Ղուկասյանը:
Նա հիշեցրեց, որ բոլոր հարցերին պատասխանեց Սերժ Սարգսյանը Գյումրիում, երբ ասաց, որ ինչքան կուզենան, այդքան էլ կխփեն: Նախագահի թեկնածուն կոչով դիմեց ՀՀ նախագահի թեկնածուներ Հրանտ Բագրատյանին, Րաֆֆի Հովհաննիսյանին և Պարույր Հայրիկյանին՝ լրջագույն պատասխանատվությամբ ընդունել Սերժ Սարգսյանի ասածը: «Սերժ Սարգսյանն ասել է բացարձակ ճշմարտությունը, որը գիտի ամբողջ հանրությունը»,- նկատեց նա:
Լուսանկարները՝ PanARMENIAN Photo-ի
