Այսօր՝ Թատրոնի միջազգային օրը Հակոբ Պարոնյանի անվան երաժշտական կոմեդիայի թատրոնում տեղի ունեցավ «Արտավազդ» ամենամյա մրցանակաբաշխությունը, որի ժամանակ ամփոփվեցին նախորդ տարվա արդյունքները:
Այս տարի մրցանակաբաշխությունը նվիրվեց Սոս Սարգսյանի ծննդյան 85-ամյակին: Արարողության բացմանը ցուցադրվեց «Բեմական խաչմերուկ» հաղորդաշարից հատվածներ, որտեղ հնչում էր մեծն վարպետի խոսքը ու դահլիճը մի քանի րոպե ծափահարություններով հարգեց Սոս Սարգսյանի հիշատակը:
Այս տարի Սոս Սարգսյանի անվան մրցանակը հանձնվեց Արման Նավասարդյանին: «Թատերարվեստին արժանի ծառայելու համար» մրցանակներ ստացան կինոգետ Սուրեն Հասմիկյանը, դերասան Կարպիս Շամլյանը, դերասան Ռուբեն Մարուխյանը, ռեժիսոր Նիկոլայ Ծատուրյանը: Վերջինս կատակեց, թե այս տարի կարծես լրացել է իր 70 տարին, սակայն ինքը դեռ «ուժ ու կորով ունի ծառայել թատրոնին»: «Ծառայել եմ թատրոնին ու դեռ շարունակելու եմ ծառայել»,- ասաց նա:
Հայաստանի թատերական գործիչների միության ոսկե մեդալ շնորհվեց նաև թատերագետ Լևոն Մութաֆյանին: Թատերարվեստին մատուցած ծառայությունների համար ոսկե մեդալ շնորհվեց նաև դերասան Արթուր Կարապետյանին:
Միակ անվանակարգը, որտեղ մրցանակներ չշնորհեցին, «Լավագույն պիես» անվանակարգն էր: 7 հոգուց բաղկացած փորձագետների խումբը մրցանակ չշնորհեց ոչ ոքի: Դրամատուրգ Կարինե Խոդիկյանը, որը այդպես էլ չկարողացավ մրցանակը հանձնել, հույս հայտնեց, որ գուցե մյուս տարի մրցանակը կկարողանա գտնել իր տիրոջը:
Եվ այսպես, «Արտավազդ» ամենամյա մրցանակաբաշխությունը «Տարվա լավագույն ներկայացում» անվանակարգում մրցանակ շնորհեց Հ. Մալյանի անվան կինոդերասանի թատրոնի «Սիրելի Պամելա» (Ջոն Պատրիկ) պիեսին: Ներկայացման բեմադրիչ Նարինե Մալյանն իր խոսքում կարևորելով մրցանակի ստացումը, նկատեց, որ այն իրենց թատրոնի համար խորհրդանշական է 2 առումով՝ նախ այն, որ այս տարի լրանում է թատրոնի 35-ամյակը ու երկրորդ՝ լրանում է Հենրիկ Մալյանի 90-ամյակը:
«Լավագույն կին դերակատար» անվանակարգում մրցանակ ստացավ Երևանի Կամերային թատրոնի դերասանուհի Լուիզա Ներսիսյանը «Ամնեզիա» (Լիզա) ներկայացման համար: «Ուրախ եմ, որ այս տարի ժյուրիի կարծիքը համընկավ իմ կարծիքին»,- մրցանակը ստանալով կատակեց դերասանուհին: Նրա խոսքով՝ ինքը հասկացել է, որ հաջողության հասնելու համար հարկավոր է «աճ գրանցել, այլ ոչ թե մրցակցել»: Այս անվանակարգում մրցանակ ստացավ նաև Հ. Պարոնյանի անվան երաժշտական կոմեդիայի թատրոնը ներկայացնող Ռուզան Գասպարյանը «Չորս պատճառ ամուսնության համար»:
«Լավագույն տղամարդ դերակատար» անվանակարգում մրցանակի արժանացան Կ. Ստանիսլավսկու անվան ռուսական դրամատիկական թատրոնի դերասան Կարեն Քոչարյանը «Ինչպե՞ս են մարդ դառնում» (Եգոր Գլումովի դերակատարման համար) պիեսից ու Վիգեն Ստեփանյանը՝ («Լիր») hայ-վրացական նախագծի համար:
«Արտավազդ» ամենամյա մրցանակաբաշխությունում «Լավագույն ռեժիսուրա»անվանակարգում հաղթող ճանաչվեց Գրիգոր Խաչատրյանը «12-րդ գիշեր կամ… Սիրուց եմ մեռնում» (Հ. Ղափլանյանի անվան դրամատիկական թատրոնից):
«Երկրորդ պլանի լավագույն տղամարդ դերակատար» անվանակարգում հաղթող ճանաչվեց Հայկ Թորոսյանը «Աշնանային իրիկնամուտ» ներկայացման համար (Վանաձորի Հ. Աբելյանի անվ. դրամատիկական թատրոն):
«Երաժշտության լավագույն հեղինակ» անվանակարգում «Արտավազդ» մրցանակ ստացավ Արթուր Մանուկյանը «12-րդ գիշեր կամ… Սիրուց եմ մեռնում» ներկայացման համար:
«Արտավազ» ամենամյա մրցանակները շնորհվում են ամեն տարվա մարտի 27-ին մրցանակաբաշխության նախորդ տարվա մարտի 1-ից մինչև մրցանակաբաշխության մարտի 1-ը ընկած ժամանակահատվածում առավել աչքի ընկած թատերական աշխատանքներին:
