Ռուսական Rian.ru կայքի հաղորդմամբ, ԵԱՀԿ Մինսկի խմբի համանախագահները ապրիլի 11-12-ը ղարաբաղյան հակամարտության կարգավորման շուրջ քննարկումներ կանցկացնեն Երևանում: Այս մասին հայտարարել է Հայաստանի ԱԳՆ մամլո քարտուղար Տիգրան Բալայանը:
Վերջինիս խոսքերով, համանախագահները հանդիպումներ են ունենալու ՀՀ նախագահ Սերժ Սարգսյանի և արտգործնախարար Էդուարդ Նալբանդյանի հետ:
Նշվում է, որ ԵԱՀԿ Մինսկի խմբի համանախագահներ Բեռնար Ֆասիեն (Ֆրանսիա), Ռոբերտ Բրադտկեն (ԱՄՆ) և Իգոր Պոպովը (Ռուսաստան) ղարաբաղյան հակամարտության կարգավորման ուղղությամբ ակտիվ քայլեր էին ձեռնարկել մարտի 24-ին Վիեննայում, ուր նրանք ներկայացրել էին դաշտային առաքելության հաշվետվությունը: Այն իրականացվել էր 2010 թվականի հոկտեմբերի 7-13-ն ընկած ժամանակահատվածում Լեռնային Ղարաբաղին հարակից 7 շրջաններում, որոնք նրա շուրջ անվտանգության գոտի են ձևավորում:
Հաշվետվության մեջ նշված էր, որ այդ անվտանգության գոտում տիրող ռեալ իրավիճակը վկայում է ներկայիս ստատուս-քվոյի անընդունելիության մասին, և որ միայն ղարաբաղյան հակամարտության խաղաղ կարգավորումը կարող է նպաստել այդ տարածքներում բնակվողների հետագա բարեկեցությանը: Դա նաև վերաբերում է բոլոր նրանց, ովքեր հետագայում բնակություն կհաստատեն այդ տարածքներում:
Այդ ամենին կարող է նպաստել այն, որ մարտի 5-ին Սոչիում Հայաստանի, Ադրբեջանի ու Ռուսաստանի միջև կայացած բանակցություններում վճռվեց բոլոր վիճելի խնդիրները կարգավորել խաղաղ ճանապարհով և ԵԱՀԿ Մինսկի խմբի համանախագահների հատուկ ներկայացուցիչների օգնությամբ հետաքննել հայ-ադրբեջանական շփման գծում գրանցվելիք զինադադարի խախտման միջադեպերը: