Այսօր՝ մարտի 22-ին, ուկրաինական մի շարք ԶԼՄ-ներ հայտնել են Ուկրաինայի նախկին նախագահ Վիկտոր Յանուկովիչի որդու՝ Վիկտոր Յանուկովիչ կրտսերի մահվան մասին։ Ըստ այդ լուրերի՝ նա մահացել է Բայկալ լճում դժբախտ պատահարի արդյունքում: Կայքերից մեկում նշվում է, որ Յանուկովիչ կրտսերը ջրասույզ է եղել ձկնորսության ժամանակ՝ գրում է Lenta.ru-ն:
Մեկ այլ վարկածով՝ նա Բայկալի մերձակայքում գտնվող գյուղերից մեկում պատրաստվելիս է եղել ռալիի հերթական մրցույթին, և նրա ջիփը ջրասույզ է եղել շրջադարձի ժամանակ:
Միջադեպի փաստը հաստատել է նաև Ռուսաստանի արտակարգ իրավիճակների նախարարությունը՝ առանց հայտնելու զոհվածի անունը: Գերատեսչությունը հայտարարել է, որ Բայկալում մարդ է ջրասույզ եղել անվտանգության պահանջները կոպտորեն խախտելու պատճառով:
Նշվում է, որ մարտի 20-ի երեկոյան հյուսիսային Օլխոն կղզում սառույցի տակ է անցել Volkswagen մակնիշի ավտոմեքենան՝ վարորդի և 5 ուղևորների հետ միասին: Քաղաքացիներն իբր թե սառույցի վրա են հայտնվել մի քանի լուսանկար անելու համար, իսկ ավտոմեքենան անցել է ճեղքի տակ: Նշվում է, որ լճի խորությունն այդ վայրում կազմում է 20 մետր:
