Ալբանիայի դատարանը արդարացրել է երկու բարձրաստիճան ոստիկանի, որոնք մեղադրվում էին 2011թ. ընդդիմության միտինգին կրակ բացելու ու երեք մարդու սպանության համար: Դա հանգեցրել է երկրում լարվածության մեծացման՝ գրում է RIA Novosti-ին՝ հղում կատարելով տեղի ԶԼՄ-ներին:
20 հազար մարդու մասնակցությամբ անցկացվող միտինգը, որն ավարտվել էր ողբերգությամբ, տեղի էր ունեցել 2011թ. հունվարի 21-ին:
Ընդդիմադիրները պահանջում էին կոռուպցիայի մեջ մեղադրվող նախարարների ու վարչապետ Սալի Բերիշի հրաժարականը, ինչպես նաև արտահերթ ընտրություններ:
Ակցիան վերաճել էր ոստիկանության հետ բախումների, ցուցարարների ուղղությամբ կրակ էր բացվել, ինչի հետևանքով զոհվել էր 4 մարդ: Փորձաքննությունը հաստատել էր, որ բոլորն էլ զոհվել են իրավապահների արձակած կրակից:
Դատապարտյալների աթոռին էին հայտնվել Հանրապետական գվարդիայի (էլիտար ոստիկանական ստորաբաժանման) ղեկավար Պրենդին ու նույն ստորաբաժանման ավագ սպա Լուպոն, որոնք մեղադրվում էին 3 մարդու սպանության մեջ: 4-րդ սպանվածի գործով մեղադրանք չէր առաջադրվել:
Դատախազությունը մեղադրյալների համար պահանջել էր ավելի քան 20 տարվա ազատազրկում: Երեկ դատարանը չապացուցված համարեց նրանց մեղքը ու արդարացրեց ևս մեկ սպայի, որը թաքցրել էր միտինգում հրաձգություն բացելու փաստերը:
Դատավճիռը մեծ արձագանք է ստացել երկրում: Ընդդիմադիր Սոցիալիստական կուսակցությունը հայտարարել է խորհրդարանից դուրս գալու մասին, իսկ սպանվածներից մեկի որդին հրապարակավ սպառնացել է ոստիկանների նկատմամբ հաշվեհարդար տեսնել:
