«Կովկաս» ինստիտուտի տնօրեն, քաղաքագետ Ալեքսանդր Իսկանդարյանի կարծիքով՝ ընտրությունների ելքը կանխորոշվեց, երբ ԲՀԿ առաջնորդ Գագիկ Ծառուկյանը որոշեց չառաջադրվել, իսկ հետո ընդդիմությունը միասնական թեկնածու չունեցավ: Այս մասին նա ասաց այսօր լրագրողների հետ հանդիպմանը:
Ըստ քաղաքագետի՝ միայն ֆորս-մաժորային իրավիճակի դեպքում Սերժ Սարգսյանը չի կարողանա հավաքել 50+1 տոկոսից ավելի ձայն: «Այդպիսի ֆորս-մաժորային իրավիճակ էր Հայրիկյանի դեմ ուղղված մահափորձը, բայց նույնիսկ դա չի խանգարի Սերժ Սարգսյանին ձայների մեծ տարբերությամբ վերընտրվել»,- իր տեսակետը հայտնեց նա:
Քաղաքագետի կարծիքով՝ ոչ բոլոր թեկնածուներն են առաջադրվում հաղթելու համար. «2008 թվականին միայն Սերժ Սարգսյանն ու Լևոն Տեր-Պետրոսյանն էին առաջադրվել հաղթելու համար, նույնն էլ հիմա է՝ կան մարդիկ, ովքեր ուզում են հայտնի դառնալ, կան այնպիսիք, ովքեր իրենց քաղաքական հետագա ճակատագիրն են հստակեցնում»:
Ալեքսանդր Իսկանդարյանը կարծում է, որ մի փոքր շատ ձայն կհավաքեն Րաֆֆի Հովհաննիսյանն ու Հրանտ Բագրատյանը,մի քիչ էլ՝ Պարույր Հայրիկյանը, բայց ոչ այնքան, որ գործող նախագահը չընտրվի առաջին փուլով:
