Մինչև դանակը չհասնի ոսկորին, առողջապահության նախարարությունը տեղից չի շարժվի: Տարեսկզբից անելանելի վիճակում էին հայտնվել շաքարային դիաբետով տառապող հիվանդները: Պոլիկլինիկաներում, որտեղից նրանց տրամադրվում է ինսուլինը՝ պետպատվերի շրջանակում, դեղորայքն իսպառ բացակայում էր: «Հրապարակը» բազմաթիվ ահազանգեր ստացավ, որ ինսուլինակախյալ մարդիկ ծանր վիճակում են հայտնվել: Սա այն դեպքն է, երբ գերատեսչության անփութությունը կարող է ճակատագրական դառնալ հիվանդների համար, և այդ պատճառով պետք է արագ ու պատշաճ կազմակերպվի ինսուլինի ներմուծումը: Թե ինչու էր նման խնդիր առաջացել, թերթը մի քանի օր առաջ դիմել էր առողջապահության նախարարություն: Օրեր անց հաղորդեցին, թե «ՀՀ առողջապահության նախարարությունը տեղեկացնում է, որ պետության կարիքների համար 2013թ. ինսուլինի առաջին խմբաքանակն արդեն Հայաստանում է»:
Այսինքն՝ եթե չլիներ ահազանգը, սայլը տեղից չէր շարժվի: Ինսուլինի բացակայության պատճառներով երեկ թերթը հետաքրքրվեց առողջապահության նախարար Դերենիկ Դումանյանից: «Բոլոր պոլիկլինիկաներն արդեն ստացել են, բոլորին բաժանվել է, պրոբլեմ չկա»: Իսկ ինչո՞ւ խնդիրն ի սկզբանե չէր լուծվել, ու միայն ծայրահեղ վիճակից հետո միջոցներ ձեռք առան: «Գնումների հետ կապված դժվարություն էր եղել, ներմուծումն էր ուշացել, արդեն կարգավորված է»,- ասաց Դումանյանը:
Թեև ոլորտի պատասխանատուն խնդիրը կարգավորված է համարում, սակայն պոլիկլինիկաներում ասում են, որ նախարարությունը, խուճապի մատնված, հանձնարարել է որոշ կազմակերպությունների՝ արագ ներմուծել ինսուլին, որն ի դեպ բելառուսական է և անորակ, մինչև հարցն ամբողջությամբ կկարգավորվի: Պրն Դումանյանը հերքեց դա. «Սա նորվեգական հումքով պատրաստված դեղանյութ է, մենք միշտ այդ դեղանյութն ենք ներկրել»:
