Աֆրիկյան վայրի փղերը նախընտրում են ապրել անվտանգ, լավ պահպանված տարածքներում և ընկնում են սթրեսի մեջ, երբ պետք է լքեն այդ վայրերը՝ հաղորդում է BBC-ի ռուսական ծառայությունը:
Գիտնականները պարզել են, որ աֆրիկյան փղերը Տանզանիայի հայտնի Սերենգետի ազգային պարկում ավելի քիչ են ենթարկվում սթրեսի, քան դրա սահմաններից դուրս:
Ըստ African Journal of Ecology ամսագրում հրապարակված հետազոտությունների՝ շատ փղեր նախընտրում են ապրել արգելոցներում՝ կարծես հասկանալով, թե որ տարածքներն են իրենց համար անվտանգ, ու ամեն կերպ փորձում են խուսափել մարդկանց հետ շփումից:
Սերենգետի ազգային պարկը օգնում է կենդանիներին պաշտպանվել այնպիսի վտանգներից, ինչպիսին է անօրինական որսը:
Գիտնականներն ուսումնասիրել են փղերի վիճակը նրանց գոմաղբի միջոցով: Պարզվում է՝ այն կենդանիները, որոնք ապրում են Սերենգետիի սահմաններից դուրս, գլյուկոկորտիկոիդներ հորմոնների մակարդակը, որն արտադրվում է սթրեսի ժամանակ, զգալիորեն բարձր է:
Թեև պարկի սահմանները ցանկապատված չեն, սակայն այդտեղ ավելի շատ փիղ է ապրում, քան պարկից դուրս: «Պատճառը հավանաբար այն է, որ փղերը փորձում են խուսափել մարդկանց հետ շփումից»,- ենթադրում է Նորվեգիայի տեխնոլոգիական համալսարանի հետազոտական խմբի անդամ, բժիշկ Այվան Ռոսկաֆտը:
Սա հետազոտողների առաջին ուսումնասիրությունը չէ, որը ցույց է տալիս, որ փղերը խուսափում են այն տարածքներից, որտեղ հնարավոր է՝ հանդիպեն մարդկանց:
