Բրիտանացի Գրեմ Հյուզը գրեթե 4 տարի է վատնել Գինեսի ռեկորդների գրքում հայտնվելու համար: Արկածախնդիրը որոշել է այցելել աշխարհի բոլոր երկրները՝ տեղաշարժվելով առանց ինքնաթիռի:
Հանուն դրա նա զոհաբերել է աշխատանքն ու սիրած աղջկան, սակայն ճանապարհորդը իր նպատակին չի կարողացել հասնել՝ հաղորդում է Mirror-ը:
33-ամյա Հյուզը 1426 օրում հաղթահարել է 250 հազար կիլոմետր: Այդ ժամանակահատվածում նա այցելել է 201 երկիր և ոչ մի անգամ չի նստել ինքնաթիռ: Ընդ որում ՝ նա երկու անգամ հայտնվել է ճաղերի հետևում՝ Կոնգոյում ու Կաբո-Վերդեում: Նրան մեղադրում էին լրտեսության մեջ:
Հավակնոտ բրիտանացին իր շրջագայությունը նկարահանել է տեսախցիկով ու տեղադրել իր YouTube-ալիքում:
Վերջին տեսանյութում երևում է, թե որքան ուրախ է տղամարդը, որ իր արկածները վերջապես ավարտվել են:
Սակայն Գինեսի ռեկորդների գրքի ներկայացուցիչները հրաժարվել են ընդունել նրա ձեռքբերումները, քանի որ Լեհաստանից Ռուսաստան տեղափոխվելիս նա մաքսային հսկողություն չի անցել: Տղամարդը ընդունում է, որ ինքը հատել է «ինչ-որ գետ»: «Դա եղել է ոչ մեծ հնարք»,- համաձայնում է Գրեմը:
Հենց այդ պատճառով Գինեսի ռեկորդների գրքի ներկայացուցիչները հայտարարել են, որ չեն կարող ճանաչել նրա ռեկորդը, քանի որ «գործ չունեն անօրինական բաների հետ»:
Ստանալով պատասխանը՝ բրիտանացին ավտոբուս է նստում ու պաշտոնապես հատում ՌԴ սահմանը:
Ներկայում նա սպասում է ռեկորդի իր հայտի վերանայմանը:
Գրեմ Հյուզը ճանապարհ էր ընկել 2009թ հունվարի 1-ին: Նա այցելել էր Հարավային Ամերիկա, Կանադա, Իսլանդիա, Հարավային Աֆրիկա, Մադագասկար, Իրան, Նոր Զելանդիա, Աֆրիկա և այլ երկրներ:
