Աշխատանքային այցով Կիեւում գտնվող Հայաստանի ԱԳ նախարար Էդվարդ Նալբանդյանը մասնակցել է Անկախ պետությունների համագործակցության արտաքին գործերի նախարարների խորհրդի նիստին:
Հայաստանի ԱԳՆ մամուլի ծառայությունից հայտնում են, որ ԱՊՀ անդամ երկրների արտգործնախարարներին ընդունել է Ուկրաինայի նախագահ Վիկտոր Յանուկովիչը:
Նախարարների խորհուրդը աշխատանքները սկսեց նախ նեղ ձեւաչափով` պատվիրակությունների ղեկավարների եւ ԱՊՀ գործադիր քարտուղարի մասնակցությամբ, ապա նիստը շարունակվել է պատվիրակությունների մասնակցությամբ:
Նիստի օրակարգը ներառում էր ԱՊՀ գործունեությանն առնչվող շուրջ տասնհինգ հարց, այդ թվում` ԱՊՀ տնտեսական զարգացման խթանման, հումանիտար, տեղեկատվական եւ միգրացիոն բնագավառներում համագործակցության, իրավապահ եւ ուժային մարմինների միջեւ անվտանգության ապահովման ոլորտում փոխգործակցության եւ մի շարք այլ հարցեր:
Նիստի արդյունքում արտգործնախարարների խորհրդի հավանությանն են արժանացել ԱՊՀ մասնակից պետությունների ղեկավարների առաջիկա կայանալիք նիստի օրակարգում ներառվելիք մի շարք փաստաթղթերի նախագծեր, այդ թվում` ԱՊՀ կազմավորման 20-ամյակի եւ Հայրենական մեծ պատերազմի 70-ամյակի եւ կապակցությամբ հայտարարությունների նախագծերը:
Կիեւում նախարար Նալբանդյանը կարճատեւ զրույցներ է ունեցել եւ փոխադարձ հետաքրքրություն ներկայացնող հարցեր է քննարկել մի շարք երկրներից իր գործընկերների՝ Ուկրաինայի արտաքին քաղաքական գերատեսչության ղեկավար Կոնստանտին Գրիշենկոյի, Ռուսաստանի արտգործնախարար Սերգեյ Լավրովի, Բելառուսի ԱԳ նախարար Սերգեյ Մարտինովի, Ղրղստանի արտգործնախարար Ռուսլան Կազակբաեւի եւ Տաջիկստանի արտգործնախարար Խամրախոն Զարիֆի հետ:
