Թուրքիայում շարունակվում են ներկայացվել հայերին հաղթելու բեմադրություններ: Հերթական նման բեմադրությունը ներկայացվել է Ստամբուլում, սակայն նվիրված է եղել Էրզրումի՝ «հայերից ու ռուսներից ազատագրման 97-րդ տարվան»:
Ինչպես տեղեկացնում է թուրքական Հաբերլեր լրատվակայքը, Իսպիր-Փազարյոլու կազմակերպությունների միությունը միջոցառում է կազմակերպել, որն ընթացել է հակահայ տրամադրություններով: Միջոցառման ժամանակ հանդես են եկել երաժշտական խմբեր, կատարողներ: Ներկա են եղել պաշտոնյաներ, մեծ թվով քաղաքացիներ: Բացի համերգից՝ միջոցառման ժամանակ նաև բեմադրություն է ներկայացվել, որի ժամանակ «թուրքական բանակը հաղթել է հայերին և վեր պարզել թուրքական դրոշը»:
Նշենք, որ օրեր առաջ Արևմտյան Հայաստանի Էրզրումի (Կարին) նահանգը հայերից խլելու 97-րդ տարելիցի առթիվ Աշքալե գավառում ներկայացում է բեմադրվել, որտեղ «հայերը» թալանել են գյուղերը, կոտորել «անմեղ» թուրք բնակիչներին, որից հետո «հերոս» թուրքերը հարձակվել են հայերի վրա ու հաղթել նրանց՝ «ազատագրելով» Էրզրումը։ Հակահայ բովանդակությամբ միջոցառմանը ներկա են եղել ինչպես ՏԻՄ ներկայացուցիչներ, այնպես էլ Անկարայից ժամանած թուրք պաշտոնյաներ։ Բեմադրության ժամանակ թուրք դերասանները ներկայացրել են, թե ինչպես են 1918 թվականի փետրվարի 28-ին մինչև Հայոց ցեղասպանությունը հոծ հայ բնակչություն ունեցած Էրզրումն «ազատագրել հայերից և ռուսներից»։
Նշենք, որ թուրքական իշխանությունների բարձր հովանու ներքո Թուրքիայում հաճախ են Արևմտյան Հայաստանի այս կամ այն շրջանը հայերից խլելու առթիվ նմանօրինակ՝ հայերի դեմ թշնամություն և ատելություն սերմանող միջոցառումներ կազմակերպվում։
Պատրաստեց՝ Գևորգ Պետրոսյանը
