Սիրիայի մայրաքաղաք Դամասկոսի հարավային արվարձաններում գործող ծայրահեղականների մի խումբ Յարմուկ փախստականների ճամբարում առևանգել է «Արդարություն» բարեգործական կազմակերպության ղեկավարին և նրան ազատելու դիմաց փրկագին պահանջել: Այս մասին հայտնում է Al Arabia հեռուստաալիքը:
«Արդարության» ներկայացուցիչները պատմել են, որ կազմակերպության ղեկավար Աբու Հալեդն առևանգվել է մարտի 3-ի երեկոյան իսլամիստական խմբավորումներից մեկի անդամների ձեռքով: Նրան ազատելու համար ծայրահեղականները 5 տոննա շաքար և բրինձ են պահանջել որպես փրկագին:
Դամասկոսի հարավային արվարձանում տարածքը, որտեղ գտնվում է պաղեստինցի փախստականների Յարմուկ ճամբարը, առավել արմատական իսլամիստական կազմակերպություններից մեկի՝ «Ջեբհաթ ան-Նուսրայի» վերահսկողության տակ է, որը պայքարում է Սիրիայի կառավարական զորքերի դեմ:
«Արդարությունը» համարվում է շրջանի ամենամեծ բարեգործական խմբերից մեկը, որն օգնում է Յարմուկի փախստականներին: