Քրդական Fıratլրատվական գործակալության հաղորդմամբ,շվեյցարաբնակ քրդերը, որպես բողոքի նշան, սև ծաղկեպսակ են դրել Ցյուրիխում գտնվող թուրքական հյուպատոսարանի շենքի առջև:
Դրանով նրանք իրենց դժգոհությունն են արտահայտել Թուրքիայում իրենց ազգակիցների նկատմամբ շարունակվող ռազմական գործողությունների դեմ: Խոսքը, մասնավորապես, վերաբերում է օրեր առաջ սահմանամերձ Հաթայի նահանգում (Ալեքսանդրետի սանջակ) սպանված 7 քուրդ զինյալներին: Բացի այդ, նրանք պահանջել են լեզվական ու մշակութային ազատություն շնորհել քուրդ ժողովրդին:
Քուրդ ցուցարարները «զինված» են եղել քուրդ առաջնորդ Աբդուլլահ Օջալանի պաստառներով ու «Քրդստանի համայնքների միության» (KCK) և «Քրդստանի աշխատավորական կուսակցության» (PKK) դրոշներով:
Ցուցարարները նաև հնչեցրել են մի շարք հակաթուրքական հայտարարություններ. «Ահաբեկիչ Թուրքիա», «Թուրքակա´ն բանակ, հեռացի´ր Քրդստանից» և այլն:
Հիշեցնենք, որ օրեր առաջ էլ ադրբեջանական խուժանն էր սև ծաղկեպսակ դրել Կարսում գտնվող և հայ-թուրքական բարեկամությունը խորհրդանշող հուշարձանի առջև, որի ապամոնտաժման գործընթացը մեկնարկելու է առաջիկա 15 օրերին:
Ի դեպ, երեկ էլ Թուրքիայի Գլխավոր շտաբը մինչև հուլիսի 1-ը ռազմական դրություն է մտցրել Թուրքիայի արևելյան և հարավարևելյան 15 շրջաններում, ուր գլխավորապես քրդեր են ապրում:
