ՌԴ նախագահի մամլո քարտուղար Դմիտրի Պեսկովը հայտարարել է, որ 2014 թ. «ութնյակի» գագաթաժողովը Սոչիում անցկացնելը նվազեցնում է ընդունող կողմի ծախսերը:
Այսօր ՌԴ նախագահ Վլադիմիր Պուտինը գագաթաժողովը 2014 թ. Սոչիում անցկացնելու մասին հրամանագիր է ստորագրել: Հրամանագրում նշված է, որ ՌԴ-ի` վերոհիշյալ գագաթաժողովում նախագահության նախապատրաստման և անցկացման աշխատանքների կազմակերպչական խմբի ղեկավարն է ՌԴ նախագահի աշխատակազմի ղեկավար Սերգեյ Իվանովը:
Պեսկովը նշել է, որ Սոչիի ընտրությունը պատահական չի եղել, քանի որ Ռուսաստանը 2014-ի գագաթաժողովում ստանձնելու է «ութնյակի» նախագահությունը: Եվ որ նման միջոցառման անցկացման համար հարկավոր է մի վայր, որն ունի համապատասխան ենթակառուցվածքներ` ապահովելու հյուրերի անվտանգությունը, ստեղծելու մասնակիցների արդյունավետ աշխատանքի համար նպաստավոր պայմաններ: Պեսկովը վստահ է, որ այն ենթակառուցվածքները, որոնք ստեղծվում են 2014-ի Ձմեռային օլիմպիական խաղերին ընդառաջ, որոնց մեծ մասն արդեն պատրաստ է, լավագույնս համապատասխանում են այդ պահանջներին:
Նախկինում քննարկվել էր նաև Սկոլկովոյում գագաթաժողովի անցկացման տարբերակը, որը ՌԴ նախագահի կողմից բացառվել էր: Հիմնական պատճառներից մեկն այդ տարածք հատուկ տրանսպորտային միջոցների, ինչպիսիք են շտապ օգնության մեքենաները, հրշեջ մեքենաները, դժվարությամբ հասնելու խնդիրն էր: Եվ որ այդ տարածքում մինչև 2016-ը շինարարական աշխատանքներ են տեղի ունենալու, և նպատակահարմար չէ շինհրապարակում նման գագաթաժողով անցկացնել:
