Երեկ երեկոյան Ճապոնիայում տեղի է ունեցել հերթական հզոր երկրաշարժը: Երկրաշարժի հզորությունն էպիկենտրոնում կազմել է 7.4 մագնիտուդ: Ճապոնիայի ազգային ոստիկանական վարչությունը տեղեկացնում է, որ երկրաշարժի հետևանքով, այս պահի տվյալներով, զոհվել է 2 մարդ, ավելի քան 130-ը ստացել են տարբեր աստիճանի մարմնական վնասվածքներ: Այս մասին հաղորդում է Kyodo գործակալությունը:
Միյագի, Ֆուկուսիմա և Իվատե պրեֆեկտուրաներում եղել են փլուզումներ, հրդեհներ: Մի քանի միլիոն մարդ զրկվել է էլեկտրականությունից: Թեպետ նշվել էր, որ ատոմակայաններն այս նոր երկրաշարժի հետևանքով չեն տուժել, սակայն հետագայում հայտնի է դարձել, որ մի քանի ատոմակայան հոսանքազրկվել են:
NHK հեռուստաալիքը հաղորդում է, որ «Օնագավա» ատոմակայանում տեղի է ունեցել ռադիոակտիվ ջրի արտահոսք: Սակայն մասնագետները նշել են, որ այս պահին ռադիացիոն ֆոնը ատոմակայանի շրջակայքում չի փոխվել: Վերականգնվել է նաև «Հիգաշի դորի» ատոմակայանի արտաքին էլեկտրական սնուցումը, որը խափանվել էր երեկվա երկրաշարժից հետո:
