«Օրենքով գողերն» ու հանցավոր աշխարհի հեղինակությունները «Մեր բակը» մոսկովյան ռեստորանում ընտրել են Դեդ Հասանի իրավահաջորդին:
Դեդ Հասանին կփոխարինի 59-ամյա «օրենքով գող» Զախարի Քալաշովը, ով հայտնի է Շաքրո Մոլոդոյ անունով: Նա այժմ իսպանական բանտում է, բանտարկության ժամկետը լրանում է այս տարվա գարնանը: Ամենայն հավանականությամբ, Շաքրոն կվերադառնա Ռուսաստան։
Դեռևս 2005-ին նրան հաջողվել էր փախչել իսպանական ոստիկաններից: Սակայն Շաքրոյին բռնել էին Արաբական Էմիրություններում և վերադարձրել Իսպանիա:
Իսպանիան մի քանի անգամ համաձայնել է Քալաշովին արտահանձնել Վրաստանին, սակայն նրա փաստաբաններն ամեն անգամ վիճարկել են այդ որոշումը: Վերլուծաբանները գտնում են, որ դա կարող է կապված լինել Միխեիլ Սաակաշվիլիի դիրքի երերման հետ: «Օրենքով գողերի» դեմ տարվող անզիջում պայքարը կապվում է բացառապես Վրաստանի ներկա նախագահի հետ:
Վրաստան արտահանձնման դեպքում նրան 11 տարվա ազատազրկում էր սպասվում՝ «Կրիստալ» խաղատան սեփականատերերից մեկին առևանգելու համար: Ավելի ուշ նրա պատժաչափին ավելացավ ևս մեկ բանտարկության ժամկետ` միջազգային նարկոաշխարհին անդամակցության մեղադրանքով:
Թեև մամուլում հրապարակումներ են եղել, որ Դեդ Հասանի ժառանգորդ կարող է դառնալ նրա զարմիկ Դմիտրի Ճանտուրիան` Միրոն, սակայն նա պարզապես ժամանակավոր պաշտոնակատարն է: Երեքն էլ`Դեդ Հասանը, Միրոն և Շաքրոն ազգությամբ եզդի են:
