ԲՀԿ-ի և իշխանությունների բանակցությունները կարծես թե ավարտվել են,և դրանց արդյունքում որոշվել է, որ ԲՀԿ-ն գոնե առժամանակ կշարունակի գոյություն ունենալ: Կուսակցությունը կղեկավարի Նաիրա Զոհրաբյանը, և այս ընտրությունը պայմանավորված է կուսակցության նոր ֆինանսական ու քաղաքական հովանավորի անձով: Իշխանությունը որոշել է ԲՀԿ-ն հանձնել վարչապետ Հովիկ Աբրահմյանի խնամակալությանը, իսկ Նաիրա Զոհրաբյանը համարվում է ԲՀԿ-ում նրա ամենավստահելի անձանցից մեկը, եթե ոչ միակը: Աբրահամյանը հանդիպել է նաև այլ ԲՀԿ-ականների հետ և նրանց համոզել, որ եթե ընդունեն Զոհրաբյանի նախագահությունը, ապա ինքը պատրաստ է տիրություն անել կուսակցությանը և լուծել կուսակցության պատգամավորական խմբակցության ամսականների հարցը: ԲՀԿ-ականները, բացի աշխատավարձից, Գագիկ Ծառուկյանից ամսական 2 հազարական դոլար ֆինանսական աջակցություն էին ստանում:
Ինչ վերաբերում է այնպիսի կարևոր հարցի, թե ինչ քաղաքական դիրքորոշում է ունենալու ԲՀԿ-ն, ապա այս հարցում ևս կա որոշակիություն: ԲՀԿ-ականները կլինեն չափավոր ընդդիմություն. կքննադատեն կառավարությանը և իշխանություններին, բայց առանց հրաժարականների պահանջների: ԲՀԿ-ականները այնքան ազատություն կունենան, որ որոշ հարցերում կքվեարկեն ՀԱԿ-ի և «Ժառանգության» նման, բայց սկզբունքային քվեարկությունների ժամանակ կքվեարկեն ինչպես ՀՀԿ-ականները:
Այնպիսի կարևոր քաղաքական հարցում ինչպիսին Սահմանադրական փոփոխություններն են, ԲՀԿ-ականները պետք է հնարավորինս չեզոքություն պահպանեն: Առայժմ նրանք հնարավորություն կունենան ասելու, որ իրենք շարունակում են դեմ լինել այդ փոփոխությունների գաղափարին, չնայած չի բացառվում, որ, ի վերջո, ստիպված լինեն գնալ Դաշնակցության բացած արահետով ու ներկայացնեն իրենց խիստ կարևոր ու ժողովրդին հուզող առաջարկները և դրանց բավարարումից հետո համալրեն այդ փոփոխությունները քարոզողների բանակը: Այդ դեպքում ԲՀԿ-ի պահպանումը միանգամայն արդարացված, իսկ կատարված ծախսերը արդյունավետ կճանաչվեն:
Մնում է հասկանալ, թե վարչապետ Հովիկ Աբրահամյանի ինչի՞ն է պետք ԲՀԿ-ն, և ի՞նչ իմաստ ունի նրա կողմից ԲՀԿ-ի վրա ինչ-որ գումար ծախսելը: Աբրահամյանի հեղինակությունը սեփական կուսակցությունում բավական տուժել է, և հանրապետականների շրջանում նա դիտարկվում է որպես կաղ բադիկ, որի օրերը հաշված են: Վերակենդանացնելով ԲՀԿ-ն և այն տանելով իր տակ՝ Աբրահամյանը փորձելու է իր համար լրացուցիչ հենարան ստեղծել: Ավելի հավանական է, որ Աբրահամյանին այդպես էլ չի հաջողվի վերակենդանացնել ԲՀԿ-ի անշնչացած մարմինը, և դա նման կլինի դիակին արհեստական շնչառություն տալուն: Այդ դեպքում նա ստիպված է լինելու անընդհատ հոգալ ԲՀԿ-ի թաղման ծախսերը:
