Ադրբեջանը շատ կարևոր աշխարհաստրատեգիական դերակատարում ունի տարածաշրջանում մասնավորապես էներգառեսուրսների շնորհիվ: Ինչպես հաղորդում է Trend գործակալությունը, այս մասին հայտարարել է Ադրբեջանի արտգործնախարար Էլմամ Մամեդյարովը Մյունխենի անվտանգության հարցերով կոնֆերանսի շրջանակներում:
Մամեդյարովի խոսքով` Ադրբեջանը պատրաստ է գազ մատակարարել եվրոպական երկրներին այնպիսի գազամուղներով, ինչպիսիք են Nabucco West-ը և Տրանսանատոլիական գազամուղը, որոնց շինարարության ավարտից հետո Եվրոպան մեծ ծավալով գազ կստանա:
Նախարարի խոսքով` այսօր այս նախագծերը շատ կարևոր են, քանի որ դա հնարավորություն կտա ապահովել Եվրոպայի էներգետիկ անվտանգությունը:
Մամեդյարովը նշել է, որ Ադրբեջանի առաջնային նպատակը ոչ միայն նավթային ենթակառուցվածքների զարգացումն է: Նա հավելել է, որ անկախության 20 տարիներին երկիրը բազմամիլիարդավոր դոլարների ներդրումներ է կատարել էկոնոմիկայի նավթային սեկտորում:
Նախարարի խոսքով` գլխավոր նախագիծ է Բաքու-Թբիլիսի-Կարս երկաթուղու կառուցումը, որը 2014թ. կմիացնի տարածաշրջանի մի քանի երկիր:
Որպես երկրի գլխավոր ձեռքբերում նախարարը նշել է արբանյակի արձակումը Arianespace ծրագրի շրջանակներում:
«Մենք զարգացնում ենք նաև էկոնոմիկայի ագրոարդյունաբերական սեկտորը: Այս բոլոր ձեռքբերումները Ադրբեջանը դարձնում են շատ կարևոր երկիր տարածաշրջանում»,- ասել է Մամեդյարովը:
