Ծխախոտ արտադրող ընկերությունների վճարած հարկերից ելնելով՝ կարելի է ասել, որ 2014-ը նրանց համար հաջող տարի է եղել: Ըստ 1000 խոշոր հարկատուների ցանկի՝ «Գրանդ տոբակո» հայ-կանադական ընկերությունը հայտնվել է առաջին տասնյակում՝ վճարելով շուրջ 10 մլրդ 500 մլն դրամ: 2013թ. ընկերությունը կիսով չափ քիչ է վճարել՝ մոտ 5 մլրդ դրամ, և զբաղեցրել է 17-րդ հորիզոնականը: Գրեթե նույնչափ՝ մոտ 5,5 մլրդ դրամ, այս տարի հարկ է վճարել «Ինթերնեշնլ Մասիս տոբակ» ընկերությունը՝ 2013թ.-ի համեմատ վճարված հարկերը և 15-րդ հորիզոնականը մնացել են գրեթե նույնը:
Ինչ վերաբերում է մյուս ընկերությանը՝ «Մասիս տոբակո»-ին, 2014թ. վճարել է 1 մլրդ 200 մլն դրամ՝ 2013-ի 600 մլն դրամի դիմաց:
Ռուսաստանյան շուկայում տարեվերջին, պայմանավորված ռուբլու արժեզրկմամբ, որոշ արտահանողներ լուրջ խնդիրներ ունեցան, նրանց ֆինանսական կորուստները շարունակվում են մինչ այսօր: Որոշ ընկերություններ ռուս գործընկերների հետ բանակցությունների փուլում են, ինչի արդյունքում որոշ տեղական ապրանքներ ռուսական շուկայում կթանկանան:
«Գրանդ հոլդինգ» ՍՊԸ-ի մամուլի և հասարակայնության հետ կապերի բաժնի պատասխանատու Վահրամ Բրուտյանը «Առաջին լրատվական»-ի հետ զրույցում դեռ դեկտեմբերի վերջին դժվարացավ նկարագրել ծխախոտի հետ կապված ռուսական շուկայի խնդիրները: Նա տեղեկացրեց, որ արտահանման ծավալները դեռ ամփոփված չեն և հնարավոր կլինի գնահատականներ տալ՝ ելնելով միայն վիճակագրությունից:
Այսօր ևս ընկերության ներկայացուցիչը դժվարացավ մեկնաբանություն տալ, քանի որ արտահանման ծավալների վերաբերյալ տեղեկատվությունը դեռ ամփոփված չէ: Ընկերությունը ամեն կերպ խուսափում է իրավիճակի վերաբերյալ գնահատականներից՝ մինչ մնացած արտահանողները խուճապային և սպասողական տրամադրությունների մեջ են. այստեղ պաշտոնական մակարդակով քար լռություն է:
Ծխախոտ արտադրող ընկերությունները մեծացրել են իրենց հարկային պարտավորությունները, ինչը վկայում է այն մասին, որ արտադրանքի ծավալները, գուցե և արտահանման աշխարհագրությունը ընդլայնվել են, սակայն ռուսական շուկայում տեղի ունեցող կոլապսը պարզապես չէր կարող ընկերության ապրանքատեսակների կողքով սահուն անցնել:
Մեր ունեցած տեղեկություններով՝ ընկերությունները դեռ անցնող տարվա նոյեմբերից են արտահանման կրճատում ունեցել: Թեև արտահանումը չի կասեցվել, սակայն դա դեռ չի նշանակում, որ ընկերությունն այս շուկայում խնդիրների չի հանդիպել:
Նկատենք, որ ըստ Ազգային վիճակագրական ծառայության հրապարակած տվյալների` նախորդ տարվա համեմատ մեր երկրում ծխախոտային արտադրատեսակների արտադրության ծավալն աճել է 65.3 տոկոսով: 2014թ.-ին Հայաստանում արտադրվել է 12.774.200.000 հատ ծխախոտ:
Ըստ մեր աղբյուրի՝ ռուսական շուկայում հայկական ծխախոտների գինը հավանաբար գարնանը կթանկանա, որովհետև ներկա գներով աշխատելու դեպքում ֆինանսական կորուստներն անխուսափելի են: Նկատենք, որ ոլորտի մյուս մարտահրավերը այդ երկրի բնակչության գնողունակության անկումն է, ինչի պատճառով սկսել են փակվել խանութներ և հանրային սննդի կետեր:
Տեղեկացնենք, որ հայկական ծխախոտը արտահանվում է ավելի քան 20 երկրներ, մասնավորապես՝ Ռուսաստան, Իրաք, Չինաստան, Սինգապուր, Իսրայել, Ֆրանսիա, Շվեդիա, Նորվեգիա, Արաբական Միացյալ Էմիրություններ և այլ երկրներ: