Ուկրաինայի նախագահ Պյոտր Պորոշենկոն ԱՄՆ փոխնախագահ Ջոզեֆ Բայդենի հետ հեռախոսազրույցում ընդգծել է երկրի արևելքում հակամարտության սրումը դադարեցնելու համար անհապաղ գործողությունների անհրաժեշտությունը։ Այս մասին ասվում է Ուկրաինայի նախագահի մամլո ծառայության հաղորդագրությունում։
Պորոշենկոն կոչ է արել իրականացնել նախկինում արված հայտարարությունները «Ուկրաինայի պաշտպանունակության ուժեղացման համար հավելյալ միջոցների տրամադրման մասին»։
Բայդենն իր հերթին նախագահին վստահեցրել է, որ կաջակցեն Ուկրաինային։
ԱՄՆ փոխնախագահն ու Ուկրաինայի նախագահը փաստել են, որ հրադադարի ռեժիմը երկրի արևելքում չի պահպանվում անջատողականների գնդակոծությունների պատճառով։
Ավելի վաղ հայտնի էր դարձել, որ Ուկրաինայի ՊՆ-ն ԱՄՆ-ին է փոխանցել անհրաժեշտ ռազմական տեխնիկայի ցուցակը:
