«Երևանի «Եվրոպական ուսանողների ֆորում» ասոցիացիա» երիտասարդական հասարակական կազմակերպությունը հայտարարություն է տարածել, որտեղ մասնավորապես ասվում է.
«Ելնելով իր գործունեության կանոնադրական սկզբունքներց ու նպատակներից,
Կարևորելով երիտասարդության շրջանում եվրոպական արժեքների տարածման և ամրապնդման առանձնահատուկ դերն ու նշանակությունը Հայաստանի Հանրապետության հետագա զարգացման գործում,
Արժևորելով եվրոպական կրթական համակարգի դերն ու նշանակությունը Հայաստանի կրթական համակարգում կատարվող բարեփոխումների մեջ,
Խրախուսելով ակտիվ քաղաքացիական հասարակության ամրապնդմանը միտված տարաբնույթ տեղական և եվրոպական միջոցառումներին հայ երիտասարդների ակտիվ մասնակցությունը, եվրոպական հեղինակավոր բուհերում կրթություն և նոր որակավորումները ստանալը,
Ընդգծելով հայ ժողովրդի պատմականորեն ձևավորած սոցիալ-մշակութային արժեհամակարգի առանձնահատկությունները, համաշխարհային քաղաքակրթության մեջ դրա դերի և ազդեցության կարևորությունը, պահպանման և զարգացման գործում երիտասարդության առաքելությունը, ինչպես նաև Հայաստանի` եվրոպական արժեքային համակարգի մաս լինելը,
Վերահաստատելով վերոնշյալ նպատակները կենսագործելու սեփական հաստատուն կամքն ու պատրաստակամությունը,
ՈՐՈՇՈՒՄ Է.
Արտահայտել իր պատրաստակամությունը բացառապես «Երևանի «Եվրոպական ուսանողների ֆորում» ասոցիացիա» երիտասարդական հասարակական կազմակերպության կանոնադրական սկզբունքների և նպատակների շրջանակներում մասնակցել «Հայաստանը Եվրոպայում»համահայկական երիտասարդական-ուսանողական շարժման կողմից կազմակերպվող միջոցառումներին,
Ցուցաբերել իր պատրաստակամությունը աջակցելու «Երևանի «Եվրոպական ուսանողների ֆորում» ասոցիացիա» երիտասարդական հասարակական կազմակերպության կանոնադրական սկզբունքների և նպատակների շրջանակներում օժանդակել և նպաստել «Հայաստանը Եվրոպայում» համահայկական երիտասարդական-ուսանողական շարժման կողմից առաջարկվող նախաձեռնություններին, որոնք իրագործվելու են վերոնշյալ սզբունքների շրջանակներում:
Հիշեցնենք, որ «Հայաստանը Եվրոպայում» համահայկական երիտասարդական-ուսանողական շարժմանը միանալու և վերջինիս կողմից առաջարկվող նախաձեռնություններին օժանդակելու պատրաստակամություն են հայտնել «Հայկական գիտական համագործակցություն (ARMSCOOP)» գիտական ցանցը, «Լոռու երիտասարդական միությունը»` ԼԵՄ հասարակական կազմակերպությունը, ինչպես նաև առաջիկայում նախատեսվում է «Երիտասարդական եվրոպական խորհրդարան»-ի (EYP) միացումը «Հայաստանը Եվրոպայում» շարժմանը:
