Կոսովոյում երեկ ընտրել են նախագահի թեկնածուին: Դա ոստիկանության գլխավոր տնօրենի տեղակալ Աթիֆեթ Յահյագան է: Այս մասին հայտնել է Կոսովոյի վարչապետ Հաշիմ Թաչին: Նման համաձայնություն է ձեռք բերվել իշխող կուսակցության` «Ալյանս՝ հանուն նոր Կոսովոյի» և ընդդիմության ներկայացուցիչների` Կոսովոյի դեմոկրատական լիգայի միջև: Այս մասին հաղորդում է Associated Press գործակալությունը: Յահյագան կզբաղեցնի նախագահի պաշտոնը այնքան ժամանակ, քանի դեռ չեն անցկացվել ուղիղ նախագահական ընտրություններ: Կողմերը որոշում են կայացրել իրականացնել սահմանադրական բարեփոխումներ, որից հետո նախագահը կընտրվի ուղիղ նախագահական ընտրությունների միջոցով:
Հիշեցնենք, որ մարտի 30-ին հրաժարական է տվել Կոսովոյի գործող նախագահ Բեջեթ Պակոլին այն բանից հետո, երբ Սահմանադրական դատարանն անօրինական էր հայտարարել դրանից մի քանի օր առաջ իրականացված նախագահի ընտրությունները: Դատարանը համարել էր, որ խորհրդարանի 120 պատգամավորներից միայն 67-ն էին մասնակցել նախագահի ընտրությանը: Ընդ որում, ընդդիմությունը հրաժարվել էր մասնակցել այդ քվեարկությանը: Արդյունքում Պակոլին ընտրվել էր 62 պատգամավորի կողմ ձայներով, որից հետո ընդդիմությունը վիճարկել էր դա Սահմանադրական դատարանում: Պակոլին հայտարարել է, որ մասնակցելու է հաջորդ նախագահական ընտրություններին:
