Հայաստանում ալյուրը սկսել է էժանանալ, 1 կգ-ն արժե 230 դրամ՝ նախկին 330-350 դրամի փոխարեն: Դեկտեմբերյան ֆինանսական շոկի ժամանակ ալյուրի կիլոգրամը որոշ խանութներում դարձավ 400-410 դրամ: Նման էժանացումը պայմանավորված է Ռուսաստանից ցածր գներով ցորենի ներմուծման հետ: Այս պահին Ռուսաստանում 1 կգ ալյուրը 120-130 դրամի սահմաններում է: Ըստ մեր ունեցած տեղեկությունների՝ Հայաստանում մի քանի ալրաղացներ լուրջ մարտահրավերի առաջ են կանգնած: Եթե այսպես շարունակվի, նրանք հնարավոր է՝ դադարեցնեն գործունեությունը (տե՛ս http://www.1in.am/1542261.html):
Տեղական շատ արտադրողներ հնարավոր է՝ լուրջ ռիսկերի առաջ հայտնվեն, քանի որ, Ղազախստանի օրինակով, մեր շուկա ցածր գներով կարող են ներմուծվել մսամթերք, հավկիթ, թռչնամիս, մակարոն և այլ ապրանքատեսակներ: Ղազախստանը տեղական ընկերություններին փրկելու համար արդեն պատրաստվում է որոշակի քայլերի, մասնավորապես, հավանաբար էմբարգո կսահմանի ռուսական էժանացած ապրանքների վրա (http://www.1in.am/1542013.html):
«Առաջին լրատվական»-ը զրուցել է ոլորտի մի քանի ընկերությունների հետ՝ պարզելու, թե ինչպես են նրանք գնահատում այս ռիսկերը և ինչպես են կարողանալու հաղթահարել իրավիճակը:
«Արաքս» թռչնաֆաբրիկայի գլխավոր տնօրեն Մանասե Եփրեմյանը մեզ հետ զրույցում հայտնեց, որ իրենք նման տեղեկություն չունեն, սակայն հնարավոր է, որ ռուսական ձուն հայկական շուկայում ավելի էժան գներով վաճառվի:
«Մեր գործունեության վրա դա չի ազդի, մեր սպառողներն արդեն կողմնորոշված են, գիտեն ինչ ապրանք ինչ գներով գնել: Նրանք անպատճառ կընտրեն տեղական որակյալ արտադրանքը, քան ներկրված էժանն ու անորակը: Անձամբ ես ողջունում են ռուսական հավկիթների տեղական շուկայում վաճառքը»,- հայտնեց ընկերության գլխավոր տնօրենը:
Եփրեմյանի խոսքով՝ նոր իրավիճակը մյուս կողմից կարող է խթան հանդիսանալ հայ արտադրողների համար: Իսկ ինչ վերաբերում է գների էժանացմանը, որպեսզի հնարավոր լինի որոշակի մրցակցային պայմաններում աշխատել, վերջինս նկատեց, որ բացառվում է, որ տեղական հավկիթն էժանանա, որովհետև գինը կախված է ոչ միայն որակից, ընկերության իմիջից, այլև արտադրական վիճակից: «Ձվի արտադրության համար կարևոր արտադրական նրբություններ կան՝ ջուրը, քամին: Դժվար թե Վոլգա գետի ջուրը այնքան մաքուր լինի, ինչքան մերը կամ քամին»,- նշեց նա:
«Հմայակ Հակոբյան ԱՁ»-ն, որը ևս մասնագիտացված է թռչնաբուծության և հավկիթների արտադրության ոլորտում, ռուսական ձվի հետ կապված ռիսկեր չի տեսնում, քանի որ կարծում է, որ գնային տարբերությունը մեծ լինել չի կարող: Տնօրեն Հմայակ Հակոբյանն «Առաջին լրատվական»-ի հետ զրույցում նշեց, որ տեղական ձուն շուկայում վաճառվում է մոտ 70 դրամով, ինչն արդարացի գին է, և ռուսական ձուն չի կարող 10 դրամից ավել տարբերություն ունենալ: Ըստ նրա՝ «Ռուսաստանում կարող է էժան վաճառվել, բայց Հայաստան հասնելով՝ մի քանի ծախսեր են ավելանալու՝ ճանապարհածախս և այլն: Այլ խնդիր էլ կա. հնարավոր է, որ մեր շուկան նրանց սրտով չլինի, ի վերջո, Դազախստանի հետ համեմատել պետք չէ: Եթե ուսումնասիրեն և տեսնեն՝ ինչքան փոքր է Հայաստանի իրացման շուկան և որակյալ արտադրանքը, հնարավոր է նաև չարտահանեն այստեղ»:
Մսամթերք արտադրող «Բեկոն» ընկերությունը ռուսական արտադրանքի տեղական շուկայում ցածր գներով վաճառքի հետ կապված ռիսկեր չի տեսնում: «Առաջին լրատվական»-ին ընկերությունից հայտնեցին, որ երկար ժամանակ կպահանջվի, մինչև ռուսական արտադրանքն իր տեղը գտնի տեղական շուկայում, որովհետև հայ սպառողները գրեթե բոլոր ապրանքների դեպքում նախընտրում են տեղականը:
