Ոչ ոքի համար գաղտնիք չէ, որ շոու-բիզնեսի աստղերը հարսանիքների և երեկույթների հաճախակի հյուրերն են: Հնդկական ամենաշքեղ հարսանիքներից մեկի հյուրերն էլ Ջենիֆեր Լոպեսն ու Նիկոլ Շերզինգերն են եղել, գրում է 7days-ը:
Երգչուհիները ժամանել են հնդկական Ուդայպուր քաղաք, որտեղ էլիտար հյուրանոցներից մեկում կայացել է 50-ամյա միլիոնատեր Սանժայ Խինդուժի և դիզայներ Անու Մահթանի հարսանիքը: Հարկ է նշել, որ երեք օր տևած հարսանիքը անցկացվել է Բոլիվուդի լավագույն ավանդույթներով: Ընդհանուր առմամբ արարողության վրա 15 միլիոն դոլար է ծախսվել:
Արարողությանը ներկա են եղել Հնդկաստանի ամենաազդեցիկ մարդիկ և հյուրեր այլ երկրներից: Արտասահմանյան ԶԼՄ-ների տվյալներով՝ քաղաքի օդանավակայանում ավելի քան 200 մասնավոր ինքնաթիռներ են վայրէջք կատարել: Օդանավակայանում հյուրերին դիմավորել են պրեմիում դասի BMW-ով վարորդները: Երեք օր շարունակ տոնակատարության 16 հազար հյուրերին հյուրասիրել են աշխարհի 16 երկրների ուտեստներով:
Ջեննիֆեր Լոպեսի և Նիկոլ Շերզինգերի հետ միասին բեմում հանդես են եկել բոլիվուդյան աստղերը՝ Արջուն Կապուրն ու Ջեկի Շրոֆը: Լուրերի համաձայն՝ Լոպեսի հոնորարը 650 հազար դոլար, իսկ Շերզինգերինը՝ 375 հազար դոլար է կազմել:
Հարկ է նշել, որ սա 50-ամյա գործարարի առաջին, իսկ նրա նորաթուխ կնոջ երկրորդ ամուսնությունն է:
