ՀՀ նախագահի ՀՀԿ թեկնածու Սերժ Սարգսյանի Տավուշի մարզ նախընտրական այցի ընթացքում նրան ուղեկցել է նաև տարածքից ընտրված և ՀՀԿ-ական դարձած պատգամավոր Հակոբ Հակոբյանը, ով «Կիլիկիա» գարեջրի գործարանի սեփականատերն է: Երեկ մի քանի հարց ուղղեցինք տարածքի պատգամավորին` գյուղում Սերժ Սարգսյանի հայտարարությունների հետ կապված: Ինչպես հայտնի է, այցի մեկնարկին Սերժ Սարգսյանն «ա լյա Րաֆֆի Հովհաննիսյան», մոտեցել է առաջին իսկ պատահած տարեց տղամարդուն և հետաքրքրվել, թե ինչ խնդիրներ ունի, ապա լսելով պատասխանը, թե` «գյուղը դատարկվում է, էրեխեքս Ռուսաստանում են», նեղսրտել է. «Ե՞ս եմ մեղավոր, որ քո էրեխեքը Ռուսաստանում են: Դրա համար է՞լ եմ ես մեղավոր, չթողնեիր՝ գնային»: Գյուղացու պատասխանը` «Եթե զավոդ լիներ, աշխատեին՝ չէին գնա», ավելի է հունից հանել Սարգսյանին. «Այ տենց եք մտածում, որ խիարը թարս ա բուսնում: Հայրիկ ջան, առանց այն էլ մենք շատ մեղքեր ունենք, ինչի՞ եք նոր մեղք բարդում մեր վրա: Եթե ասեիք՝ գյուղում գազ, ջուր, ճանապարհ չլիներ, կասեի ես եմ մեղավոր, դրա համար ես եմ պատասխանատու, բայց որ քո էրեխեքը գնացել են Ռուսաստան՝ ե՞ս եմ մեղավոր: Թող մնար գյուղում հող մշակեր, անասուն պահեր»,- հայտարարել է նախընտրական այցով գյուղ այցելած ՀՀԿ թեկնածուն:
– Պարոն Հակոբյան, որպես տարածքի պատգամավոր, համամի՞տ եք Սերժ Սարգսյանի հետ, որ գյուղացիները սխալ են մտածում, դրա համար «խիյարը թարս է բուսնում» էդտեղ:
– Ես ճիշտն ասած, չեմ լսել դա: Չեմ կարող մեկնաբանել:
– Ենթադրենք՝ չեք լսել, ամեն դեպքում Դուք իրեն սատարում եք, որպես էդտեղի պատգամավոր, համամի՞տ եք իր կարծիքի հետ:
– Այո, ես սատարում եմ իրեն, որովհետև ինքը ՀՀԿ ղեկավարն է, ես էլ դարձել եմ ՀՀԿ կուսակցության անդամ: …Խիյարի թարս աճելը կամ շիտակ աճելը չգիտեմ, չեմ լսել, չլսած բանի մասին չեմ կարող մեկնաբանել: Ինչ վերաբերում է, թե գյուղացիները աշխատում են, չեն աշխատում, այդ հարցին ես կարող եմ հստակ պատասխանել, որ կան մարդիկ, որոնք աշխատում են, կան մարդիկ, որ չեն աշխատում: Օրինակ՝ իմ ընտրատարածքում, կոնկրետ` Շամշադինի, Բերդի տարածաշրջանում մոտ 80 գյուղ կա: Գյուղեր կան, որ շատ լավ մշակում են, օրինակ` Արծվաբերդ գյուղը, ես հպարտորեն եմ ասում, արտասահմանում շատ եմ եղել, և տեսել եմ էնտեղ ոնց են մշակում, գյուղեր կան, որ նայում եմ մշակած հողերը, հիանում եմ, բայց կան նաև անմշակ հողեր, որոնք չեն մշակում: Էն, ինչ որ նախագահն ասում է` ես, օրինակ, համամիտ եմ իր հետ, որ գյուղերում գործարան կառուցելու կարիք չկա, գյուղերի գործարանը հողն է: Գյուղացին պետք ա հողի հետ աշխատի, իրա գործարանն ա դա:
– Իսկ եթե պայմաններ ստեղծված չեն, որ գյուղացին իր բերքը նորմալ իրացնի և չի կարողանում այդ գյուղի հողով ապրել, այդ դեպքում ի՞նչ անի:
– Էնպես չի, որ բերքը կա, լիքն է, գնորդը չկա: Ես ինքս ասել եմ՝ ցորեն, եգիպտացորեն, ինչքան ուզում են, թող արտադրեն:
– Ակնհայտ է նաև, որ դա Արարատյան դաշտավայրը չի, բերքն այդտեղ շատ առատ չի լինում և հող մշակել սահմանամերձ գյուղում այնքան էլ հեշտ չի:
– Սերժ Սարգսյանն էսօր ասաց, որ էն տարածքները, որոնք սահմանամերձ են, կրակի տակ են, հողի հարկից ազատում ենք: Դա ինձ թվում ա, մեծ օգնություն ա գյուղացուն: Էլ ի՞նչ անի Սերժ Սարգսյանը:
– Չե՞ք կարծում, որ այդ խոստումը բավական ուշացել է, և այդ տարածքները համարյա ամայացել են, մարդիկ արտագաղթել են այդտեղից և հիմա հողի հարկից ազատվելով` դժվար թե հետ վերադառնան:
– Արտագաղթն, իհարկե, շատ վատ բան է, մեր ազգի համար դա կործանարար է, բայց արտագաղթ ամեն տեղ էլ կա: Երևի մենք պետք է յուրաքանչյուրս մեր տեղը էնպես անենք, որ կանխենք էտ արտագաղթը:
– Ասել է թե` համաձայն եք Սերժ Սարգսյանի հետ, որ իշխանությունն` ի դեմս իրեն մեղավո՞ր չի, որ արտագաղթ կա, որ երիտասարդությունը գնացել է գյուղից, ինչպես նա ասել է այդ գյուղացուն:
– Ինձ թվում է` պետք չի անձնավորել, թե ով է մեղավոր, բոլորս էլ մեղավոր ենք, ինձանից սկսած, ես էլ եմ մեղավոր, դուք էլ եք մեղավոր: Աֆրիկայում չգիտեմ ինչ ա շուռ գալիս, ասում ենք` Սերժ Սարգսյանը մեղավոր ա:
– Բայց խոսքը Հայաստանի մասին է, Հայաստանի դատարկվող գյուղերի մասին է, ինչը իշխանության սխալ քաղաքականության հետևանք է: Հնարավոր չէ դա անտեսել, ինչպես Սերժ Սարգսյանն է փորձում իր վրայից այդ պատասխանատվությունը գցել:
– Ես ինչքան որ գիտեմ, ինքն իր վրայից չի գցում ոչ մի բան, և ես մի քանի անգամ լսել եմ, որ ինքն ասել է` խնդիր կա էդտեղ, անելիքներ շատ ունենք բոլորս:
– Հիմա, Ձեր կարծիքով, ո՞վ է մեղավոր, որ «խիյարը թարս է բուսնումե` բնակչությո՞ւնը, թե՞ Սերժ Սարգսյանը:
– Վարունգ ասենք: Իշխանությունը վարունգ չի ցանում, ժողովուրդն ա ցանում վարունգ, եթե թարս ա բուսնում, բնականաբար իշխանությունն ի՞նչ մեղավոր ա: