Մի քանի շաբաթ է, ինչ Սիրիայում սկսվել են հակակառավարական հուզումներ, և մտավախություն կա, որ արաբական աշխարհում սկսված հեղափոխական ալիքը հասել է հենց Սիրիա: Սիրիայում կատարվող դեպքերը չափազանց հետաքրքիր են Հայաստանի համար, քանզի այնտեղ մեծաթիվ հայկական համայնք կա, որն էլ անհանգստացած է Սիրիայում տիրող իրավիճակով:
Սիրիահայ մի գործարար, ով չցանկացավ ներկայանալ, վախենալով հենց Սիրիայում ծայր առած հուզումներից, մեզ հետ զրույցում նշեց, որ թեև Ասադների Սիրիան խիստ երկիր է և այնտեղ քաղաքական ազատությունների հետ խնդիրներ կան, սակայն հայկական համայնքը Սիրիայում միշտ էլ եղել է արտոնյալ դիրքերում. «Մեզ հնարավորություններ են տրվել սեփական ակումբներն ու միություններն ունենալ, կան հզոր հայկական դպրոցներ, որտեղ երեխաներն իսկական հայ են մեծանում, հնարավորություն կա սեփական ազգի պատմությունն ուսուցանել: Միայն մեր սկաուտական շարժումներն ուղղակի անգին են, սեփական բանակավայրեր ունենք: Ո՞ր մի համայնքն այդքան արտոնություն ունի` ոչ մի»:
Սիրիահայ գործարարը նշեց, որ հայ համայնքը Ասադի կողմից է և ցանկանում է, որ նրա ղեկավարած համակարգը պահպանվի, քանզի մտավախություն ունեն, որ իշխանության կգան իսլամիստները. «Եթե հանկարծ երկրում իշխանության գան սուննիներն ու շիաները (էլ չեմ ասում քուրդերի կամ թուրքմենների մասին), մշտապես կունենանք միջկրոնական և ազգամիջյան բախումներով երկիր: Այսօր մեր կանայք և աղջիկները կարողանում են առանց փաթթոցների (մուսուլմանական գլխաշորեր) դուրս գալ փողոց: Վաղը, եթե ինչ-որ բան փոխվի, վստահ չեմ, որ ամեն ինչ նույն ձևի կլինի»:
