Royal Dutch Shell ընկերությանը քննադատել են «նացիստական» անվանումով նավ օգտագործելու համար, հայտնում է The Financial Times-ը: Ավելի վաղ հաղորդվում էր, որ Shell-ը պատրաստվում է շահագործումից հանել Brent Delta հանքավայրը Հյուսիսային ծովում: Ընկերությունը մտադիր է ստորջրյա սարքավորումը բարձրացնել աշխարհի խոշորագույն Pieter Schelte վերամբարձ նավի վրա:
Թերթը նշում է, որ Shell-ը չի հրաժարվել բրիտանական ջրերում այդ նավն օգտագործելու ծրագրերից, որն անվանվել է նացիստ հանցագործի պատվին, նույնիսկ Pieter Schelte-ի նիդերլանդացի տերը հրաժարվել է այն վերանվանել: Shell-ի գործողությունները Հյուսիսային ծովի երկու կողմերի հրեական համայնքի քննադատությանն են արժանացել:
Երկրորդ համաշխարհային պատերազմի ժամանակ Փեթեր Շելթե Հեերեման ծառայել է տխրահռչակ դոկտոր Յոզեֆ Մենգելեի հետ, ասվում է հոդվածում: Նիդերլանդների դատարանը Հեերեմային մեղավոր է ճանաչել ռազմական հանցագործությունների համար: Սակայն Հեերեման իր համար նշանակված 3 տարվա ազատազրկման պատժի կեսից պակաս մասն է կրել, քանի որ դատարանին համոզել է, որ պատերազմի ժամանակ ինքը հրաժարվել է նացիստական գաղափարախոսությունից և սկսել է հակառակ ճակատով աշխատել: Պատերազմից հետո Հեերեման որոշ ժամանակով մեկնել է Վենեսուելա, իսկ հետո վերադարձել Նիդերլանդներ ու հիմնել Heerema ընկերությունը:
Shell-ն ասել է, որ աջակցում է արշավին, որի մասնակիցները պահանջում են վերանվանել նավը, որի տերը Հեերեմայի որդիներից մեկն է՝ Allseas-ի նախագահ Էդվարդ Հեերեման: Shell-ում նշել են, որ իրենք Allseas-ին խնդրել են քննարկել նավի վերանվանման հարցը, բայց որոշումը բացառապես Allseas իրավասության ներքո է:
Մեծ Բրիտանիայի կառավարությունում ասել են, որ Pieter Schelte-ի անվանումը Allseas-ի և Shell-ի գործն է:
