Հունվարի 27-ին Լոս Անջելեսում Քրիս Բրաունի մասնակցությամբ նոր դեպք է տեղի ունեցել: Նա և իր ընկերները ձայնագրման ստուդիայի դիմաց՝ ավտոկայանատեղիում, ծեծկռտուքի մեջ են ներքաշվել:
Ականատեսները հայտնում են, որ Բրաունը փորձել է դուրս գալ կայանատեղիից, բայց նրան խանգարել են մեկ ուրիշ աստղի՝ «Գրեմմի» մրցանակի հավակնորդ Ֆրենկ Օուշենի ավտոմեքենաները: Օուշենը հայտարարել է, որ դա իր ստուդիան է և իր կայանատեղին: Ծեծկռտուքի հետևանքով մի փոքր վնասվել է Ֆրենկի ձեռքը, ով Twitter-ի իր էջում գրել է. «Քրիսն ու նրա ընկերները հարձակվեցին ինձ վրա: Ձեռքիս ափն է վնասվել, երկու ձեռքով չեմ կարողանա նվագել «Գրեմմի»-ի ժամանակ:
Օրենքի ներկայացուցիչները հայտարարել են, որ դատելով ամեն ինչից՝ վեճի ժամանակ Քրիս Բարունը հարվածել է Օուշենին։
Հետաքննությունն արդեն սկսվել է: Հիշեցնենք՝ Բրաունը 2009-ին ծեծել էր Ռիհաննային և դատապարտվել 5 տարվա պայմանական ազատազրկման ու 180 օր հանրօգուտ աշխատանքի:
2010-ին Բրաունը հաջողությամբ անցել է տնային բռնության հակում ունեցող տղամարդկանց վերականգնողական կուրսը:
2012-ի հունիսին Բրաունը Նյու Յորքի ակումբներից մեկում ընդհարվել էր ռեփեր Դրեյքի ընկերների հետ:
