Վերջին երկու շաբաթվա ընթացքում տրանսպորտային կոլլապսի մեջ հայտնված Աթենքը, որի բնակչությունը 4 մլն է, երկուշաբթի օրը շունչ քաշելու հնարավորություն ունեցավ: Տրանսպորտային միության հայտարարության համաձայն՝ երկարատև գործադուլները ժամանակավորապես դադարեցվել են:
Մոտակա ժամերին աշխատանքի կանցնեն ավտոբուսների և տրոլեյբուսների վարորդները, նաև ամբողջ երկրում կսկսեն աշխատել գնացքները, իսկ Աթենքում կգործի քաղաքամերձ էլեկտրական գնացքը: Մետրոն և տրամվայը հանգստյան օրերից սկսել են կանոնավոր աշխատել, երբ աշխատակիցներին ծանուցել են աշխատանքի չներկայանալու դեպքում ձերբակալման որոշման մասին:
Տրանսպորտային միությանը չի հաջողվել հասնել նրան, որ կառավարությունը փոխի աշխատավարձերի կրճատման որոշումը, որը հունվարի 1-ից կիրառության մեջ է մտել, որպես բյուջեի միջոցների տնտեսման ձև: Կառավարությունը հայտարարել էր, որ այդ հարցում զիջումների չի գնալու, իսկ դատարանները տրանսպորտի ոլորտի աշխատակիցների արարքն «անօրինական» էին որակել:
