Chrome պլատֆորմով աշխատող Google-ի մշակած նոութբուքերի վաճառքն Acer-ին բերում է ամերիկյան շուկայի եկամտի մոտ 10%-ը՝ չնայած այն շուկայում հայտնվել է 2012-ի նոյեմբերին, հայտնում է vestifinance.ru-ն:
Windows 8 օպերացիոն համակարգն առայժմ չի կարողացել գրավել գնորդների ուշադրությունը: Դրանով աշխատող համակարգիչներին բաժին է հասնում եկամտի 2%-ից էլ պակաս:
«Windows 8-ը հաջողություն չունեցավ: Վաճառքում դրա հայտնվելուց հետո համակարգչային շուկան չաճեց, իսկ դա իրերի դասավորության հասկանալի և պարզ ինդիկատոր է»,- Bloomberg-ին տված հարցազրույցում հայտարարել է Acer-ի նախագահ Ջիմ Վոնը:
Նրա խոսքով՝ Acer-ն ավելի մեծ ուշադրություն կդարձնի սմարթֆոնների շուկային: Այս ոլորտում վաճառքի ծավալները պետք է 2012-ի 500 000 սարքից 2014-ին ավելանան մինչև 5 մլն:
Ավանդական անհատական համակարգիչների շուկան շարունակում է կրճատվել: Համաշխարհային շուկայում դրանց վաճառքի ծավալը 2012-ին կրճատվել է 3.5%-ով՝ մինչև 352 մլն սարք: HP-ն կարողացել է պահպանել առաջին տեղը՝ չնայած 6.7%-ով վաճառքի ծավալների կրճատմանը: Asus-ն արձանագրել է աճի ամենաարագ տեմպը՝ 17,1%:
