Վաղը տեղի է ունենալու ԲՀԿ նախագահ Գագիկ Ծառուկյանի անձնական նախաձեռնությունը հանդիսացող քաղաքական-քաղաքացիական համաժողովը, որը կարելի է համարել «հինգաստղանի» համաժողով, և այն պատճառով, որ կանցկացվի Ծառուկյանին պատկանող հինգաստղանի նոր հյուրանոցային շքեղ համալիրում, և նաև այդպիսին կարելի է համարել ընդհանրապես հայտարարված մասշտաբների առումով, քանի որ Ծառուկյանը խոստանում է աննախադեպ մասշտաբային, ներկայացուցչական միջոցառում:
Միջոցառումը, ինչպես հայտնի է, տեղի էր ունենալու հունվարի 20-ին, և այդ մասին դեռ դեկտեմբերի վերջերին հայտարարվեց, սակայն Գյումրիի դեպքերի կապակցությամբ հետաձգվեց մինչև փետրվարի 5-ը: Այս զուտ հետաձգումն իհարկե թողեց իր նստվածքը, թեև այդ նստվածքը սկսեց ձևավորվել նաև Գյումրիի դեպքերից հետո անմիջապես: Ծառուկյանի նախաձեռնության մասին հայտարարությունը, ըստ էության, արվեց քաղաքական-տնտեսական մի իրավիճակում, երբ բոլորովին այլ տեսլականներ էին առջևում, և, ըստ էության, տեղի է ունենում լիովին այլ իրավիճակում, որտեղ առաջ են եկել նոր երևույթներ, իրողություններ, հանգամանքներ, որոնք արմատապես փոխել են և՛ մթնոլորտը, և՛ օրակարգը:
Գագիկ Ծառուկյանի նախաձեռնությունը, ըստ էության, քաղաքական սեզոնի մեկնարկ էր հանդիսանալու, և ԲՀԿ նախագահը, անկասկած, մտադիր էր տպավորիչ մեկնարկով սկսել սեզոնը՝ այդպիսով մի քանի հարց լուծելով. նախ՝ խախտելով վերջին շրջանում ՀԱԿ-ի հաստատած ավանդույթը՝ մեկնարկը սկսողի կարգավիճակը, որ տեղի էր ունենում Մարտի 1-ի հանրահավաքով: Եվ հետո՝ Գագիկ Ծառուկյանը բնականաբար փորձելու էր համաժողովի միջոցով նախանշել առաջիկա քաղաքական տարվա օրակարգը, այսինքն՝ լինելու էր «նորաձևության օրենսդիրը» 2015 թվականի համար՝ օրակարգ թելադրողը: Սակայն օրակարգը, այսպես ասած, առաջ անցավ Ծառուկյանից. Գյումրիի ողբերգություն և դրան հաջորդած իրադարձություններ, որոնք բոլորովին նոր հարցեր են բերել հասարակական-քաղաքական օրակարգ՝ կապված հայ-ռուսական ռազմակայանի, հայ-ռուսական հարաբերությունների, ընդհանրապես, Հայաստանի անվտանգությանը վերաբերող հարցերի հետ:
Գյումրիի դեպքերին հաջորդեցին դեռ հունվարի 2-ից սկսված, աստիճանաբար գագաթնակետին հասած սահմանային բախումները, որոնց հաջորդեց Սերժ Սարգսյանի հայտարարությունը՝ Ադրբեջանին, այսպես ասած, պատժելու իրավունքի վերապահման մասին: Սա, ըստ էության, հայտարարություն էր Հայաստանի ռազմական նոր մարտավարության մասին, որը չէր կարող չլինել միջազգային քաղաքական փոփոխությունների արդյունք և միաժամանակ չի կարող չազդել քաղաքական իրողությունների վրա Հայաստանում:
Այս ամենին հաջորդեց Հիմնադիր խորհրդարանի երթը և դրա հանդեպ ուժի կիրառումը ղարաբաղյան իշխանությունների կողմից, որը ևս նոր իրողությունների ու հարցերի առաջ է դրել Հայաստանի հասարակությանը: Այս հարցերը, ըստ էության, քաղաքական մեծ ճնշում են բերում Գագիկ Ծառուկյանի համաժողովի վրա, որովհետև, մի կողմից, նրա օրակարգը չեն ակնհայտորեն, սակայն այս ամենով հանդերձ՝ իհարկե, անհնար է պատկերացնել, որ նմանօրինակ լայն համաժողովում չլինեն հստակ անդրադարձեր այս կարևորագույն հարցերին: Այդ դեպքում՝ կոնկրետիկայից զուրկ լինելու դեպքում, համաժողովը կստացվի իրականությունից կտրված կամ շատ դեկլարատիվ:
Այս ամենին իհարկե գումարվում են արդեն ԲՀԿ-ի, այսպես ասած, օրակարգային հարցերը, որոնց թվում ամենաաղմկոտը այս օրերին շրջանառության հարկի մասին օրենքի նախագիծը և այս նախագծի հենքի վրա կառավարության հետ հերթական պայմանավորվածությունն էր:
Մյուս շատ կարևոր իրողությունը, իհարկե, շարունակում են մնալ ոչիշխանական ուժերի ներքին հարաբերությունները, ՀԱԿ-ԲՀԿ հարաբերությունները: ՀԱԿ-ը չի մասնակցելու Ծառուկյանի համաժողովին, որի ակնհայտ նպատակներից մեկն էլ, իհարկե, ԲՀԿ-ի այսպես ասած առաջնորդությունը, առաջատարությունը ընդգծելն էր, Գագիկ Ծառուկյանի առաջնորդությունը ֆիքսելը, ըստ որում՝ լայն ձևաչափով: Բնականաբար, Լևոն Տեր-Պետրոսյանին այս ամենը չէր կարող ոգևորել, և ՀԱԿ-ի չմասնակցելը, ըստ էության, ցուցադրական դեմարշ էր:
Ի՞նչ ազդակներ է պարունակելու համաժողովը այս հարաբերությունների առումով, հատկապես երբ ազդարարվել է, որ դրանից հետո Ծառուկյանը հանդիպում է ունենալու Րաֆֆի Հովհաննիսյանի և Լևոն Տեր-Պետրոսյանի հետ: Բնականաբար, ԲՀԿ նախագահը ամեն ինչ կանի, որպեսզի այդ հանդիպումներից առաջ անցկացվող համաժողովն իր համար տրիումֆալ արդյունք ունենա՝ Հովհաննիսյանի և Տեր-Պետրոսյանի հանդեպ դիրքային առավելություն ունենալու համար:
Լուսանկարը՝ armtimes.com-ի
