Ավստրալական 2DayFM ռադիոկայանը վերջնականապես փակել է Hot 30 ժամանցային ծրագիրը այն բանից հետո, երբ Էդուարդ VII-ի անվան հիվանդանոցի աշխատակազմի հետ հաղորդավարների հերթական հումորային խաղարկումը ողբերգական հետևանքներ է ունեցել: Բուժքույրերից մեկը ենթադրաբար վերջ է դրել իր կյանքին: Այս մասին հայտնում է AFP գործակալությունը:
Հաղորդավարներ Մել Գրեյգն ու Մայքկ Քրիստիանը հաղորդման շրջանակներում դեկտեմբերի սկզբին զանգահարել էին լոնդոնյան հիվանդանոց, որտեղ հղիության հետ կապված բարդությունների պատճառով գտնվում էր Քեմբրիջի դքսուհի Քեյթ Միդլթոնը: Նրանք ներկայանալով որպես թագուհի և Ուելսի արքայազն` հետաքրքրվել էին Քեյթի առողջական վիճակով: Աշխատակցուհի Ջաստինա Սալդանան հեռախոսազանգը միացրել էր դքսուհու պալատ, որտեղ հերթապահ բուժքույրը պատմել էր նրանց Քեյթի առողջական վիճակի մասին:
Երկու օր անց Սալդանային կախված էին գտել հիվանդանոցին կից իր բնակարանում: Հաղորդավարները հեռացվել էին եթերից:
Southern Cross Austereo ընկերության գլխավոր տնօրեն Ռիս Հոլերան հայտարարել է, որ ծրագիրն այլևս չի հեռարձակվի:
Բուժքրոջ մահվան գործով լսումները կվերսկսվեն 2013-ի մարտի 26-ին: Սալդանայի ընտանիքը իշխանություններից պահանջում է անցկացնել բազմակողմանի հետաքննություն, իսկ հիվանդանոցից պահանջում է հումորային հեռախոսազանգին հաջորդած իրադարձությունների ողջ տեղեկությունը բացահայտել, ինչը կարող էր երիտասարդ կնոջը հասցնել ինքնասպանության: Սալդանան երեք գրություն է թողել, որոնցից մեկում ենթադրաբար քննադատել է իր գործընկերներին:
