Gangnam Style հիթով աշխարհում մեծ հռչակ ձեռք բերած հարավկորեացի ռեփեր Psy-ն ելույթ կունենա Հարավային Կորեայի նախագահ Պակ Կին Հեի երդմնակալությանը: Այս մասին հայտնում է Rosbalt-ը՝ հղում անելով նորընտիր նախագահի մամլո ծառայությանը:
Շշուկները, որ Psy-ն կարող է ելույթ ունենալ երդմնակալության արարողությանը, հայտնվել էին դեռևս հունվարի 18-ին, սակայն պաշտոնապես հաստատվել են միայն հիմա:
Արարողությունը տեղի կունենա փետրվարի 25-ին: Հրավիրված է 60 հազար մարդ, այդ թվում՝ երկրի հասարակ քաղաքացիները, որոնք հայց են ներկայացրել միջոցառման կայքում:
Դեռևս հայտնի չէ, թե կատարողը արարողության ժամանակ ինչ երգեր կներկայացնի:
