Երեկ թիվ 182 ավագ դպրոցում 12-րդ դասարանի աշակերտ Հակոբը զուգահեռ դասարանի իր ընկերոջը դանակահարել էր հենց դպրոցում, դասամիջոցին: Իսկ պատճառը, թերևս, եղել է նախկինում ունեցած կոնֆլիկտը, որը, տնօրենի խոսքով, իր միջամտությամբ հարթվել էր:
«Դե, գիտեք՝ դեռահասներ են, տաքարյուն, սիրահարված, ինչ-որ խնդիրների մեջ: Բայց այդ դեպքը պահի տակ ինչպես է տեղի ունեցել՝ չգիտեմ: Ընդամենը րոպեներ է տևել»,- «Առաջին լրատվական»-ի հետ զրույցում ասաց դպրոցի տնօրեն Ռուզաննա Ալավերդյանը՝ հավելելով. «Այդ երկու աշակերտները ժամանակ առաջ փոքր կոնֆլիկտ են ունեցել, ինչ-որ միջանցքով անցնելիս կպել են իրար, թե ինչ: Սովորական ինչ-որ բան էր տեղի ունեցել: Կանչեցի, զրուցեցի, բացատրեցի, որ մի դասարանում են սովորում, իրենց չի սազում նման պահվածք: Նրանք էլ խոստացան, որ դա չի կրկնվի: Խոստացան, իրար ձեռք սեղմեցին, որ այլևս չեն վիճի, և ոչ մի բան չի լինի, ու գնացին»,- պատմեց տնօրենը:
Սակայն երեկ Սամվելը դուրս է եկել դասարանից, մյուսը պատուհանի մոտ կանգնած նայել է նրան, Հակոբը հայհոյել է Սամվելին, ու այդպես վիճաբանություն է սկսվել: «Սամվելը, որին դանակահարել է Հակոբը, սպորտսմեն է, ուժեղ տղա է, իսկ Հակոբը թույլ երեխա է: Հավանաբար վախից թե չգիտեմ ինչից՝ դանակահարել է»,- ասաց Ալավերդյանը՝ հավելելով, որ դանակահարող Հակոբը թույլ առաջադիմության տեր երեխա է, իսկ Սամվելը՝ լավ սովորող, խելացի, պարզապես մի քիչ բռնկուն բնավարությամբ, «իսկ թե իրականում ինչ է եղել՝ կպարզի քննությունը, ավել ոչ մի բան չեմ կարող ասել»:
Նշենք, որ կատարվածի առթիվ Երևանի քննչական վարչության Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով: Սամվել Մարտիրոսյանը ճանաչվել է տուժող: Նա ներկայումս գտնվում է Մուրացանի հիվանդանոցում՝ կրծքավանդակի ձախ կեսի կտրած-ծակած թափանցող վերք ախտորոշմամբ: Իսկ Հակոբը, հանցագործությունը կատարելու կասկածանքով, հենց նույն օրը ձերբակալվել է:
