Ինչպես արդեն տեղեկացրել ենք, 33-ամյա ամերիկուհի Սերենա Վիլյամսը դուրս է եկել Ավստրալիայի 2015թ. բաց առաջնության եզրափակիչ, որտեղ ուժերն է չափելու ռուս թենիսիստուհի Մարիա Շարապովայի հետ: Սերենան խոսել է իր ելույթների մասին:
«Շատ երջանիկ եմ, որ եզրափակիչ եմ դուրս եկել և գոհ եմ, թե ինչպես էի հարվածում կարևոր պահերին: Ինչ վերաբերում է առողջական վիճակիս, օրեցօր ավելի ու ավելի լավ եմ զգում ինձ:
Արդեն երկար ժամանակ այս մրցաշարի եզրափակիչ դուրս չէի եկել: Չի կարելի թուլացնել զգոնությունը: Պետք է ավելի ու ավելի լավ խաղալ:
Մարիան հիմա հիանալի է խաղում: Նա դեռ մրցաշարում է, քանի որ մարտիկ է և երբեք չի հանձնվում: Ես նույնպես լավ տրամադրությամբ եմ մոտենում եզրափակչին:
Ցանկանում եմ հաղթել եզրափակչում, բայց կյանքի ու մահվան հարց չէ: Երկուսս էլ կորցնելու ոչինչ չունենք»,- Սերենայի խոսքերը մեջբերում է մրցաշարի պաշտոնական կայքը:
