2013 թ. DARPA Առաջադեմ պաշտպանական հետազոտական նախագծերի գործակալության համար Boston Dynamics ընկերության մշակած Atlas ռոբոտ-հումանոիդը կատարելագործվել է և արդեն կարող է ինքնուրույն քայլել՝ առանց մետաղալարերի: Ինչի է ընդունակ նոր նախատիպը՝ կպարզվի DARPA Robotics Challenge (DRC) մրցույթի ժամանակ, որը տեղի կունենա 2015 թ. հունիսի 5-ին և 6-ին, հայտնում է vesti.ru-ն:
1,88 մ հասակով և 156,5 կգ քաշով հումանոիդը նախատեսված է արտակարգ իրավիճակներում ռոբոտների օգտագործման միջոցների ուսումնասիրման համար: Կատարելագործման արդյունքում բարձրացել է Atlas-ի արդյունավետությունը, շարժունությունը և կայունությունը: Սարքի 75%-ը փոխարինվել է նոր բաղադրիչներով:
Այդ մոդելի պատրաստման համար ավելի թեթև նյութեր են օգտագործվել, քան նախորդ տարբերակում: Դա ինժեներներին հնարավորություն է տվել ռոբոտը «զինել» 3,7 կվ/ժ հզորությամբ լիթիումա-իոնային մարտկոցով և փոփոխվող ճնշման պոմպի նոր համակարգով: Դրա շնորհիվ ռոբոտը ոչ միայն հնարավորինս անձայն կաշխատի, այլև տարբեր առաջադրանքների կատարման ռեժիմում ինքնուրույն աշխատանքի մեկ ժամ կապահովվի:
Ռոբոտի ձեռքերն ու ուսերն այնպես են տեղափոխվել, որ իրանի մեջ ավելի շատ ազատ տեղ լինի: Դա Atlas-ի ինժեներներին հնարավորություն է տվել ձեռքերն օգտագործել իրանի առջևում, այնպես որ հիմա օպերատորը կարող է կատարվողին հետևել ռոբոտի «աչքերով»:
Բացի դրանից՝ ռոբոտի ձռռքերի ներքևի մասերում էլեկտրական կրիչներ են դրվել, և Atlas-ը հիմա կարողանում է ամբողջ ձեռքի փոխարեն դաստակները շարժել: Հիմա ռոբոտի հոդերը կարող են ավելի շատ բեռ կրել:
Փոփոխություններ են արվել նաև գոտկատեղի և ծնկի հոդերին, որոնք ուժեղացվել են, և 3 համակարգիչներում, որոնք պատասխանատու են առաջադրանքների ընդունման և ծրագրման համար: Ռոբոտի գլուխը ևս հագեցվել է անլար երթուղղիչով՝ հեռակառավարման համար:
