Ըմբշամարտի ակումբային թիմերի Գերմանիայի Բունդեսլիգայում, որտեղ 14 ակումբների թիմեր էին մեկնարկել, երեկ երեկոյան կայացան կիսաեզրափակչի երկրոդ հանդիպումները:
Արդեն հայտնել ենք, որ առանց առաջատարի՝ 2014թ. հունահռոմեական ոճի ըմբշամարտի 98 կգ քաշային կարգի աշխարհի չեմպիոն Արթուր Ալեքսանյանի (նա մինչ այս իր թիմի կազմում 4 անընդմեջ հաղթանակ է տոնել), հանդես եկած «Մայնց -88»-ը, հունվարի 17-ին կիսաեզրափակչի առաջին հանդիպումում 9:10 հաշվով զիջեց անցած առաջնության չեմպիոն «Նենդիգեն»-ին:
Այդ հանդիպմանը «Մայնց-88»-ի կազմում ելույթ ունեցավ ազատ ոճի մեր ճանաչված վարպետներից մեկը՝ 30-ամյա Միհրան Ջաբուրյանն, ով իր անցկացրած վերջին բոլոր գոտեմարտերում հաղթանկաներ էր տոնել ու մեծ ներդրում ուներ թիմի կիսաեզրափակչի ուղեգիր նվաճելու գործում: Այս անգամ Միհրանը համառ ու անզիջում պայքարում 5:6 հաշվով զիջեց «Նենդիգեն»-ի կազմում ընդգրկված Մոնակոյի ներկայացուցիչ, 35-ամյա Գենադի Տուլբեային, ով մոլդովացի հանրահայտ ըմբիշ է ու այդ երկրի հավաքականի կազմում 2003թ. դարձել է աշխարհի փոխչեմպիոն, 2001 և 2005 թթ Եվրոպայի չեմպիոն, իսկ Մոնակո տեղափոխվելուց հետո 2014թ-ին Ֆինլանդիայում ընթացած Եվրոպայի առաջնությունում 57 կգ քաշային կարգում դարձել է աշխարհամասի փոխչեմպիոն:
Երեկ կայացած «Նենդիգեն» – «Մայնց-88» պատասխան հանդիպմանը, որ կայացավ հանրահայտ «Գեյզինգեն» մարզապալատում՝ 2000 հանդիսականների ներկայությամբ, «Մայնց-88»-ի կազմում 98 կգ քաշային կարգում ասպարեզ մտավ նաև Արթուր Ալեքասանյանը: Նա փայլուն անցկացրվեց հերթական գոտերմարտն ու 9:0 հաշվով պարտության մատեց Պետեր Օհլերին և իր թիմին թանկարժեք 3 միավոր պարգևեց:
Միհրան Ջաբուրյանն այս անգամ գոտեմարտելու հնարավորություն չունեցավ, քանի որ «Նենդիգեն»-ն այս անգամ 57 կգ քաշային կարգում հունահռոմեկան ոճի ըմբիշ էր ներկայացրել՝ Վիկտոր Չիբանուին, ով 16:0 հաշվով հաղթեց «Մայնց-88»-ի ներկայացուցիչ Իլլար Սեֆային ու թիմային 4 միավոր պարգևեց իր թիմին: Այնպես որ, Ալեքսանյանի փայլուն գոտեմարտը բավարար չեղավ թիմային վերջնական հաղթանակ տոնելու համար:
Նրա թիմակիցները վճռորոշ պահին չկարողացան օգնել աշխարհի չեմպիոնին ու «Մայնց-88»-ն այս մրցամարտում ընդհանուր՝ 10:13 հաշվով զիջելով մրցակցին՝ դուրս մնաց հետագա մրցապայքարից:
Երկրորդ տարին անընդմեջ եզրափակիչ դուրս եկավ «Նենդիգեն»-ը, որի կազմում անցած մրցաշրջանում չեմպիոնի կոչման էր արժանացել նաև մեր անվանի ըմբիշներից մեկը՝ Ռոման Ամոյանը:
Այս անգամ եզրափակչում «Նենդիգեն»-ի մրցակիցը կլինի «Վեինգարտեն»-ը, որը երեկ 10:7 (առաջին մրցամարտում հաղթել էր 11:6) հաշվով պարտության մատնեց «Քյոլերբախ»-ին:
Հայաստանի ըմբշամարտի ֆեդերացիայի մամլո ծառայություն
