Ավան և Նոր Նորք վարչական շրջանների ընդհանուր իրավասության դատարանի դատավոր Արմեն Վարդապետյանի վարույթում է Սերյոժա Գևորգյանի և Արմեն Ավագյանի գործը:
Ըստ մեղադրանքի՝ 23-ամյա Սերյոժան և 19-ամյա Արմենը գործով չպարզված ևս մեկ անձնավորության հետ, նախնական համաձայնության գալով, ձեռնոցներով ու դիմակներով, ինչպես նաև ատրճանակներով ու դանակներով զինված՝ 2014 թվականի ապրիլի 24-ի կեսգիշերին նկուղային հարկի եվրոպատուհանը տեխնիկական միջոցների գործադրմամբ բացելով՝ ապօրինի մուտք են գործել Ծարավ Աղբյուրի փողոցի առանձնատներից մեկը:
Տանտիրուհու և նրա երկու դուստրերի կյանքի ու առողջության համար վտանգավոր բռնություն գործադրելու սպառնալիքով ներխուժածները պահանջել են գումար և ոսկեղեն:
Արդյունքում, ըստ մեղադրանքի, ավազակային հարձակմամբ նրանք հափշտակել են տարբեր իրեր և գումար՝ տուժողին պատճառելով 2 միլիոն 574 հազար 670 դրամի գույքային վնաս:
Այնուհետև, առանց հափշտակելու նպատակի նրանք տիրացել են «Տոյոտա» ավտոմեքենային, դրանով դեպքի վայրից դիմել են փախուստի:
Մեքենան նույն օրը անվնաս կայանել են Կոտայքի մարզի Մայակովսկի գյուղում:
Սերյոժա Գևորգյանին և Արմեն Ավագյանին մեղադրանք է առաջադրվել ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ մասերով և 183 հոդվածի 2-րդ մասի 2-րդ կետով:
Ամբաստանյալների խափանման միջոցը կալանքն է:
Այս գործով դատական նիստը տեղի կունենա 2015 թվականի հունվարի 27-ին:
