Ադրբեջանական Apa լրատվական գործակալության փոխանցմամբ, Բաքվում մեկնարկել են դիպուկահարների պատրաստման դասընթացները: Այս մասին հայտարարել է ադրբեջանական բանակի գեներալ-մայոր Նովրուզալի Օրուջևը:
Վերջինիս խոսքերով, դասընթացների ավարտից հետո դիպուկահարները լիովին պատրաստ կլինեն թշնամու դեմ մարտի գնալուն. «Մենք դիպուկահարներին պատրաստում ենք բանակի ու ուժային կառույցների համար: Բացի դիպուկահարին բնորոշ քողարկամիջոցների ուսուցումից, մենք նրանց սովորեցնում ենք օգտվելու այլ տիպի զենքերից, տիրապետելու ձեռնամարտի ու քարտեզներից օգտվելու կանոններին:
Առաջին նպատակի համար մենք 100 թեկնածուներից ընտրել ենք 24-ին (այդ թվում նաև աղջիկներ): Նմանատիպ դասընթացներ պետք է կազմակերպենք նաև այլ քաղաքներում: Միջնակարգ դպրոցի բարձր դասարանի աշակերտների համար դա կլինի անվճար, իսկ մնացած բոլոր ցանկացողների համար` վճարովի հիմունքով:
Դասընթացների ժամանակ մենք օգտվում ենք ադրբեջանական բանակի սպառազինության կազմում գտնվող СВД դիպուկահար հրացաններից, տարբեր տիպի ատրճանականերից և իսրայելական արտադրության Tavor STAR և 21 UZI զենքերից»:
Հիշեցնենք, որ ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսն օրեր առաջ հայտարարեց, որ եթե հակամարտող կողմերը ռազմաճակատի գծից հետ քաշեն դիպուկահարներին, ապա դա դրական ու արդյունավետ հետևանքներ կունենա` ընդգծելով, որ դիպուկահարները կողմերից և ոչ մեկին չեն կարող ռազմական ու քաղաքական հաջողություն ապահովել: