ԱՄՆ-ում դատարանը 19-ամյա աղջկան դատապարտել է 4 տարվա ազատազրկման՝ ԴԱԻՇ («Իրաքի և Շամի իսլամական պետություն») ահաբեկչական խմբավորմանը օգնելու փորձի համար: Այս մասին հաղորդում է Agence France-Presse-ը:
Շենոն Քոնլին մեղավոր է ճանաչվել ԴԱԻՇ-ին և այլ ծայրահեղական խմբերի՝ ներառյալ «Ալ-Քաիդա»-ին, ֆինանսական օնություն ցուցաբերելու փորձի համար:
Աղջիկը համացանցով ծանոթացել է տղամարդու հետ, ով հայտնել է, թե Սիրիայում խմբավորման անդամ է: Քոնլին և ենթադրյալ գրոհայինը նշանադրվել են՝ ռազմական գործողությունների գոտի աղջկա ուղևորությունը կազմակերպելու նպատակով:
Նրա խոսքերով՝ տղամարդու հետ շփումից հետո ինքը ջիհադին մասնակցելու ցանկություն է զգացել: Նա անցել է բոլոր հնարավոր մարզումները և նույնիսկ սովորել US Army Explorers կադետական ծրագրով:
Շենոն Քոնլիի՝ ԴԱԻՇ-ի շարքեր մտնելու ծրագրերի մասին իմացել են FBI-ում: Նրանք բազմիցս աղջկան նախազգուշացրել են նման գործողությունների համար պատասխանատվության մասին, այնուամենայնիվ՝ վերջինս որոշել է Սիրիա մեկնել: Աղջկան ձերբակալել են Դենվերի օդանավակայանից Թուրքիա թռչելու փորձի ժամանակ:
