ՀՀ գյուղատնտեսության նախարար Սերգո Կարապետյանը տեղեկացրեց, որ Շիրակի մարզի Ախուրյան համայնքում գտնվող շաքարի գործարանի սեփականատիրոջ հետ բանակցություններից հետո հանգել են պայմանավորվածության, որ այս տարի ճակնդեղը մթերվելու է 40 դրամով:
Նշենք, որ գործարանն աշխատում է ինչպես ներմուծվող, այնպես էլ տեղական հումքի վրա:
Այսօր ԱԺ-ում կազմակերպված լսումների ժամանակ նախարարը տեղեկացրեց, որ մշակվել է ճակնդեղագործության զարգացման 2 տարվա ծրագիր, որն անցյալ տարի տապալվել է, որովհետեւ շաքարի տեղական հումքի մթերման գինը սահմանվել էր ընդամենը 25 դրամ, որն էլ շատ ցածր է եղել ու գյուղացին շահագրգռված չի եղել ճակնդեղ մշակելու, քանզի այդ գնի դեպքում վնաս էր կրելու:
Սերգո Կարապետյանը նաեւ տեղեկացրեց, որ այս տարի նախատեսվում է Շիրակի եւ Լոռու մարզերում 1000-1500 հեկտարի վրա կազմակերպել ճակնդեղի մշակություն. «Այդ տարածաշրջանում հիմնական գյուղատնտեսական ճյուղը համարվում է ճակնդեղի եւ հացահատիկային կուլտուրաների մշակությունը, ոչ թե փուրչուլուղի մշակությունը»,- հավելեց նախարարը:
Հիշեցնենք, որ 2010թ. դեկտեմբերի 1-ից Ախուրյանի շաքարի գործարանը դադարեցրել էր աշխատանքները Բրազիլիայից բերվող հումքի բացակայության պատճառով, իսկ տեղական հումքը բացակայում էր մթերման ցածր գնի պատճառով:
