ԱՄՆ-ը պետք է անձամբ գրի միջազգային առևտրի կանոնները՝ ստեղծելու պայմաններ բոլոր ընկերությունների համար: Նման դիրքորոշում է հայտնել նախագահ Բարաք Օբաման՝ «Երկրի դրության մասին» ուղերձով դիմելով Կոնգրեսին: Այս մասին հայտնում է RIA Novosti-ն:
«21-րդ դարում ավելի շատ ընկերություններ՝ ներառյալ փոքր բիզնեսը, պետք է ամերիկյան ապրանքներ վաճառեն արտերկրում: Եվ այժմ մեր ընկերություններն արտահանում են ավելի, քան երբևէ: Սակայն Չինաստանը ցանկանում է կանոններ գրել աշխարհի առավել արագ զարգացող տարածաշրջանի համար: Դա մեր բիզնեսն ու մեր աշխատողներին կդնի հետ մնացողի վիճակում»,- ասել է Օբաման:
Նախագահն ընդգծել է, որ ԱՄՆ-ը չի կարող նման բան թույլ տալ: «Մենք պետք է գրենք այդ կանոնները: Այդ իսկ պատճառով ես խնդրում եմ երկու կուսակցություններին ինձ ապահովել լիազորություններով՝ խթանելու առևտրի ոլորտը՝ ամերիկացի աշխատողներին աջակցելու և Ասիայից Եվրոպա նոր ուժեղ առևտրային համաձայնագրեր ընդունելու համար»,- ասել է նա:
