Գյուղատնտեսությանը նվիրված այսօրվա խորհրդարանական լսումների ժամանակ ԱԺ նախագահ Հովիկ Աբրահամյանը գյուղնախարար Սերգո Կարապետյանին առաջարկեց նախարարության վրա կարևոր գործառույթ դնել:
Իր հարց-առաջարկը ներկայացնելուց առաջ Հովիկ Աբրահամյանը նշեց, թե աջակցելու է Սերգո Կարապետյանի բոլոր նախաձեռնություններին, քանի որ վերջինս «պրագմատիկ է մոտենում խնդիրներին` ոչ թե ոմանց նման ութ ժամ աշխատում են, որից յոթը խորհրդակցություն անում»:
«Ճի՞շտ եք համարում, որ նախարարությունն անմիջական մասնակցություն ունենա պարարտանյութի, դիզվառելիքի, գյուղտեխնիկայի և որակով թունաքիմիկատների ու սերմերի ներկրմանը` գոնե առաջիկա 5 տարիներին, որպեսզի նպաստի գյուղատնտեսության զարգացմանը»,- գյուղնախարարին հարցրեց և միևնույն ժամանակ դա անել առաջարկեց Աբրահամյանը` նշելով, որ լավ գիտակցում է, որ իր ասած գործառույթները հիմա մասնավորի ձեռքին են. «Կառավարությունը մի քանի տարի պետք է կենտրոնացված գնումներ կատարի ու այդպիսով օգնի գյուղացուն»:
«Ոչ թե ճիշտ է, այլ անհրաժեշտ»,- պատասխանեց գյուղատնտեսության նախարար Սերգո Կարապետյանը:
Նախարարը նաև բողոքեց, թե մի շարք հարցերի վերաբերյալ իրեն մատնացույց են անում, թե շուկայական խնդիրներին նախարարությունը չպետք է միջամտի.
«Որպես բիզնեսի ներկայացուցիչ` ես դա ընդունում եմ, բայց քանի որ մեզ մոտ ոչ թե շուկա է, այլ «բազար», և ով ինչ ուզում անում է, ցանկացած գին է թելադրում, ապա, այո, մինչև տնտեսության զարգացումը դա, այնուամենայնիվ, պետք է վերցնենք մեր հսկողության տակ»: