ՌԴ վարչապետ Դմիտրի Մեդվեդևը սխալ և անհնարին է համարում 2018-ի նախագահական ընտրություններին Վլադիմիր Պուտինի հետ մրցակցությունը, քանի որ իրենք դասվում են նույն քաղաքական ուժին, և մրցակցությունը անիմաստ է: Մեդվեդևը նման կարծիք է հայտնել Bloomberg հեռուստաալիքին տված հարցազրույցում:
Բացի այդ, քաղաքական գործիչը հայտարարել է, որ անհրաժեշտ է պարզել Սերգեյ Մագնիտսկու մահվան պատճառներն ու հանգամանքները: «Շատ ցավալի է, որ նա մահացավ բանտում: Նա կորպորատիվ փաստաբան էր և պաշտպանել է իրեն վարձած մարդկանց շահերը: Ես չգիտեմ՝ նրա գործը կավարտվի մեղադրակա՞ն, թե՞ արդարացնող վճռով: Պետք է պարզել պատճառները, թե ինչու է նա մահացել բանտում: Դա, իսկապես, պետության համար շատ կարևոր հանձնարարություն է»,- ասել է նա:
Մեդվեդևի կարծիքով՝ մնացածը «առանձին քաղաքացիների քաղաքականացված երևակայությունն է՝ ուղղված ՌԴ տարածքում սեփական կոմերցիոն օպերացիաներն արդարացնելուն»:
«Այդ մարդիկ միլիարդավոր դոլարներ են աշխատել Ռուսաստանում բաժնետոմսերի առևտրից: Խարդախ գործողությունների հայտնաբերման պահին նրանք քաղաքական դիրքորոշում են որդեգրել: Այդ իսկ պատճառով Մագնիտսկու պատիվը արդարության որոնման հարց չէ: Որքան էլ տխուր հնչի, դա քաղաքականացված գործընթաց է»: Այս մասին հայտնում է ITAR-TASS-ը:
«Գազպրոմի» մենաշնորհից հրաժարվելու հնարավորության վերաբերյալ ՌԴ կառավարության ղեկավարը հայտնել է, որ նման հարցի պատասխանելու համար անհրաժեշտ է դիտարկել բոլոր հետևանքները: «Պոտենցիալ կերպով դա հնարավոր է, քանի որ մենք ունենք գազի անկախ մատակարարներ, սակայն մենք չպետք է գումար կորցնենք: Դա ամենագլխավորն է» ,- ասել է Մեդվեդևը: